Úshinshi megapolıs zııalylary el táýelsizdiginiń 30 jyldyǵyna arnalǵan jıyn ótkizdi

1194
Adyrna.kz Telegram

Shymkent qalasy ákiminiń birinshi orynbasary Shyńǵys Muqannyń qatysýymen Ál-Farabı ǵylymı-ámbebap kitaphanasynda «Táýelsiz Qazaqstan: Jasampazdyqqa toly jyldar. Shymkent qalasynyń basty jetistikteri» taqyrybynda dóńgelek ústel ótti.

Basqosýǵa «Nur Otan» partııasy Shymkent qalalyq fılıaly tóraǵasynyń orynbasary Muratáli Qalmuratov, jazýshy, jýrnalıst, qoǵam qaıratkeri Marhabat Baıǵut, M. Áýezov atyndaǵy OQÝ prorektory Sáken Májinbekov, qalalyq máslıhattyń depýtaty Ráshkúl Ospanálıeva, «Azamattyq Alıans» QB tóraǵasy Jumaǵalı Bilisbekov, «Shymkent kelbeti», «Panorama Shymkenta» gazetteriniń bas redaktory Baqtııar Taıjan, QR Jýrnalıster Odaǵy Shymkent qalalyq fılıalynyń tóraǵasy, «Ońtústik» telearnasynyń dırektory Ýálı Qydyrov, «Qarataý dástúrli óner» mektebiniń dırektory Birjan Baıtýov, «Dýstlık» ózbek etnomádenı birlestikteri qaýymdastyǵynyń tóraǵasy Ikramjan Hashımjanov, Tokıo Olımpıadasynyń qola júldegeri Darhan Asadilov, «Rýhanı jańǵyrý» óńirlik jobalyq keńsesiniń meńgerýshisi Záýre Oralbaeva qatysty.

Alqaly jıynda sóz alǵan Shyńǵys Jumabekuly Qazaqstannyń sońǵy úsh onjyldyqtaǵy memlekettik qurylystaǵy tarıhı serpilisiniń, ártaraptandyrylǵan naryqtyq ekonomıkany qurýda úshinshi megapolıstiń alar orny erekshe ekenin jetkizdi. Qala halqynyń 52 paıyzy egemendik alǵan 30 jyldyń ishinde dúnıege kelgenin jáne shahar turǵyndarynyń ortasha jasy 28-di quraǵanyn aıtty. Sondaı-aq, aıtýly jyldy shaharda keń kólemde merekeleý barysyn atap ótti.

– Egemendik alǵaly elimizde kóptegen aýqymdy jobalar atqarylyp, sonyń jemisin kórip kelemiz. Osy jetistikterdiń ishinde Shymkent qalasy men jurtshylyǵynyń alatyn úlesi edáýir. Táýelsizdiktiń 30 jyldyǵyn keń kólemde qamtý maqsatynda basqarmalar men aýdan ákimdikterinen usynystar jınaqtalyp, ár aıǵa arnaıy ataýlar berilgen. Bul rette bıyl birinshi jartyjyldyqta qala boıynsha Táýelsizdigimizdi ulyqtaǵan 175 is-shara ótkizildi. Onyń ishinde respýblıkalyq 74 aýqymdy is-sharaǵa 45 myńnan astam adam qamtyldy. Bul jumystar áli de óz jalǵasyn tabatyny sózsiz, - dedi Shyńǵys Muqan.

Dóńgelek ústel barysynda qatysýshylar Táýelsizdiktiń 30 jyldyǵy aıasynda Shymshaharda atqarylǵan jumystar men jetken jetistikterdi talqylady. Sonymen qatar, «Týǵan qala» atty beınerolıkti tamashalady.

A.JÁDIGERULY

Pikirler