Bokstan Belgradta ótip jatqan álem chempıonatynda Qazaqstan komandasynyń qorjyny kúmis júldemen tolyqty. 20 jastaǵy Mahmud Sabyrhan álemdik syndy ekinshi orynmen aıaqtady dep habarlaıdy Olympic.kz-ke silteme jasap "Adyrna" ulttyq portaly.
54 kelige deıingi salmaqta synǵa túsken Mahmud Sabyrhan fınalda japondyq Tamoıa ýboıdan 0:5 esebimen utyldy.
Atalǵan jekpe-jek Mahmud Sabyrhan úshin úlken tájirıbe bolǵany anyq. Álem chempıonaty barysynda mamandar men jankúıerlerden joǵary baǵa alǵan Sabyrhan fınalda jastyǵynan jáne tájirıbeniń azdyǵynan tize búkti.
Birinshi raýndta Mahmud azdaǵan basymdyqpen jeńiske jetkenimen, qalǵan eki raýnda japondyq boksshynyń soqqylary dál ári myqtyraq boldy.
Bul Mahmud Sabyrhan qatysyp otyrǵan alǵashqy álem chempıonaty. 20 jasynda álem chempıonatynyń fınalynda synǵa túskeni de Mahmudtyń talantty boksshy ekenin kórsetetini anyq.
"Adyrna" ulttyq portaly
