Aqtóbe oblysynyń ákimi Ońdasyn Orazalın Muǵaljar aýdanynyń áleýmettik-ekonomıkalyq damýymen, memlekettik baǵdarlamalardyń júzege asyrylýymen tanysyp, eki aýyldaǵy gazdy iske qosý rásimine qatysty dep habarlaıdy "Adyrna" ulttyq portaly.
Jumys sapary Aqkemer aýylynyń kúrdeli jóndelgen kire beris jolyn qaraýdan bastaldy. Jumysty "Aqtóbe adal qurylys" JShS merdiger mekemesi kúzdiń basynda aıaqtaǵan. Barlyǵy 1,1 shaqyrym avtokólik jolynyń tósemi jańartyldy. Joba "Nur Otan" partııasynyń saılaýaldy baǵdarlamasyn oryndaý boıynsha jol kartasy aıasynda júzege asyrylǵan.
Elek aýylynda óńir basshysy gaz qubyryn iske qosý rásimine qatysty. Memleket aýyl turǵyndaryn gazben qamtýǵa 229 mln teńgeden astam qarajat bóldi. 4,7 shaqyrym gaz qubyry tóseldi. Bul da "Nur Otan" partııasynyń saılaýaldy baǵdarlamasy boıynsha júzege asyrylǵan jobalardyń biri. Elek aýylynda barlyǵy 106 úı men úsh áleýmettik nysan bar. Budan bólek, kezekte turǵandarǵa jeke turǵyn úı salýǵa berý úshin 208 jer telimi daıyndalǵan.
"Men osy aýylda týdym jáne ómir boıy osynda turyp kelem. Gazdy 54 jyl kúttim. Bul jańalyq biz úshin úlken qýanysh boldy. Úı tirligi kishkene azaıdy. Bul sondaı-aq, biraz únem, men qysqa kómir men aǵash satyp alý úshin jylda 200 myń teńgedeı jumsadym", - deıdi aýyl turǵyny Nurjamal Ybyrasheva.
Oblys ákimi: "Gaz – biz eń birinshi kelgen kezde Elek turǵyndarynyń aıtqan negizgi ótinishi bolatyn. Bıyl osy jobany júzege asyrýǵa múmkindik týdy. 208 jer telimi jańa úıler salýǵa daıyndalyp jatyr. Eldi mekenderińizdiń keleshegi zor. Gaz bar, elektr bar, úlken magıstraldi joldyń boıynda ornalasqan. Aýyldyń ári qaraı damýy sizderge de - turǵyndarǵa da, ıaǵnı sizderdiń eńbekqorlyqtaryńyz ben birlikterńizge baılanysty", - dep atap ótti.
Sonymen birge óńir basshysy áleýmettik nysandardy, eń aldymen mektepterdi gaz qubyryna tez qosýdy tapsyrdy.
Qyzmettik sapar Qandyaǵashta jalǵasyp, Ońdasyn Orazalın byltyr "Jumyspen qamtýdyń jol kartasy" memlekettik baǵdarlamasy arqyly kúrdeli jóndelgen ortalyq stadıonnyń qyzmetimen tanysty.
Stadıonda 500 adamǵa arnalǵan minber men 25 metrlik myltyq atatyn tır bar. Munda fýtboldan, shahmat pen paýerlıftıngten, dzıýdo, sambo jáne qazaqsha kúresten oqý- jattyǵýlar ótedi.
Osy jyly Qandyaǵashta bıznestiń áleýmettik jaýapkershiligi aıasynda tórt kópqabatty úıdiń qasbeti jańartyldy. Jumystyń demeýshisi - "Kentavr" JShS.
"Kentavr" JShS-na barlyǵy 30 mln teńge bólindi. Qarajattyń bir bóligi qasbetterdi syrlaýmen qatar kóktemde erigen sýdyń tasý qaýpi tónip turǵan kóshelerge aryq salýǵa jumsaldy. Budan ózge, osy jyly qalada jalpy quny 37 mln teńge bolatyn jaıaýjol salynyp, birneshe aýla jaryqtandyryldy. "Nurly kósh" degen úlken shaǵyn aýdan ashqaly jatyrmyz. Jyl sońyna deıin ınfraqurylym júrgizip, keıin 135 jer telimin berýdi josparlap otyrmyz", - dedi aýdan ortalyǵyn damytý boıynsha josparlary jaıynda baıandaǵan Qandyaǵash qalasynyń ákimi Talǵat Ótemuratov.
Oblys ákimi sondaı-aq, dene shynyqtyrý - oıyn-saýyq kesheniniń qurylys barysymen tanysty. Munda kelýshilerge oıyn, kúres jáne jattyǵý zaldarynan bólek, úlken basseın bolady. Nysandy keler jyly naýryz aıynda paıdalanýǵa berý josparlanyp otyr. Ońdasyn Orazalın birneshe óndiris nysanyna bardy. Olardyń qatarynda "Neohım" JShS-nyń gaz-beton qurylysyna arnalǵan buıymdar shyǵaratyn zaýyty bar. Bıyl zaýyt 2 mlrd teńgege qaıta qalpyna keltirildi. Munda jylyna 110 m3-ge deıin qabyrǵa bloktary men keýek gaz-betondary shyǵarady. Negizgi problema – bilikti ári tar beıindi mamandar jetispeıdi. Bul suraq qazirgi tańda jergilikti kolledjben birge sheshilýde.
"Qarapaıym zattar ekonomıkasy" baǵdarlamasy boıynsha kórsetilgen qarjylaı qoldaý "KazTermoGrýpp" JShS-nyń bazalt mıneraldy maqtasyn shyǵaratyn zaýytqa jan bitirýge múmkindik berdi. Bıyl mamyr aıynda jasalǵan qalpyna keltirý jumystarynyń quny 1,9 mlrd. teńge. Nátıjesinde bes jyl turyp qalǵan óndiris iske qosylyp, 230 adam jumyspen qamtyldy. Kásiporynnyń jyldyq óndiristik qýattylyǵy – 30 myń tonna bazalt mıneraldy maqtasy. Ónim ishki naryqqa jetkiziledi, sonymen qatar, Reseı men Ózbekstanǵa eksporttalady.
Sol kúni Muǵaljar aýdanynda taǵy bir aýylǵa gaz kirdi. Juryn aýylyndaǵy jobany júzege asyrýǵa 108 mln teńge bólingen. 1330 adam turatyn 292 tútin, sonymen qatar, alty áleýmettik nysan gazben qamtylmaq.
"Juryn aýylynda byltyr úsh kósheniń jolyna asfalt tóselgen edi. Bul baǵyttaǵy jumystar jalǵasatyn bolady. Balalar las jerdi baspasyn dep mektepke jaıaýjol salamyz. Aýdan ákimi jergilikti mektep ǵımaratyn qalpyna keltirý qajettigin jetkizdi. Bul joba qoldaý tabady. Óıtkeni, aýyl ósip keledi, buryn kóship ketkender qaıtyp kelip, úı salyp jatyr. Sondyqtan bala da kóp bolady", - dedi aýyl turǵyndarymen tildesken oblys ákimi.
Óńir basshysy Embi qalasynyń ári qaraıǵy damýynyń jospary týraly baıandamany tyńdady. Qazirgi tańda Embide 320 orynǵa arnalǵan jańa mekteptiń qurylysy júrip jatyr, jyl sońyna deıin qalanyń barlyq kóshesi jaryqtandyrylady, osy maqsatta 32 kóshede jaryqtandyrý jelilerin salý jumystary bastaldy. Sondaı-aq, joldardy salý jáne jóndeý jumystary jalǵasady.
Oblys ákimi Embi qalasyndaǵy 45 páterlik bes qabatty úıdiń berilýine qatysty. Sosyn kóp jyldar boıy qaraýsyz qalǵan 90 páterli bes qabatty úıde júrip jatqan jóndeý jumystarynyń barysyn qarap shyqty. Páterler kúrdeli jóndeýden keıin jergilikti atqarýshy organda kezekte turǵandarǵa beriletin bolady.
"Adyrna" ulttyq portaly.
