Aqtöbe öŋırınde Möŋke bidıŋ 350 jyldyq mereitoiyna orai, ūlttyq mūrany saqtau men därıpteuge baǧyttalǧan auqymdy mädeni, ǧylymi jäne sporttyq ıs-şaralar ūiymdastyryldy.
Atap aitqanda, Möŋke bidıŋ ömırı men mūrasyna arnalǧan «Möŋke bi» tarihi dramasy, halyqaralyq ǧylymi-täjıribelık konferensiia, ūlttyq sporttyq oiyndar, jyr müşäira baiqaulary, ūlt aspaptar orkestrınıŋ keŋ kölemdegı konsertı körermen nazaryna ūsynyldy. 60 aq şaŋqan kiız üilerden jasaqtalǧan etnoauyl 20 myŋnan asa qala tūrǧyndary men öŋırge kelgen qonaqtardy qabyldady.
Is-şaralarǧa Qazaqstan men şetelden ǧylym, mädeniet jäne qoǧam qairatkerlerı, sarapşylar şaqyrylǧan.
Eskertkışke gül şoqtaryn qoiu räsımıne oblys äkımı Ashat Şaharovpen qatar toiǧa arnaiy kelgen meimandar da qatysty.
Sodan soŋ, mereitoilyq şara Öner ortalyǧynda jalǧasty. Mūnda «Myŋjyldyqty boljaǧan Möŋke bi» ǧylymi-täjıribelık konferensiia öttı.
«Memleket basşysy Qasym-Jomart Toqaev Ūlttyq Qūryltai otyrysynda: «Bızdıŋ körnektı tarihi tūlǧalarymyz ūlyqtauǧa äbden laiyq. Olardyŋ esımın el jadynda saqtau – perzenttık paryzymyz ärı jalpyūlttyq bolmysymyzǧa tän qasiet», – dep atap ötken bolatyn. Jetı jasynan tura bilık aityp, tyŋdaǧandy ūiytqan Möŋke bi – Memleket basşysy atap ötken körnektı tarihi tūlǧalar qatarynda.
Möŋke Tıleuūly – öz däuırınıŋ ǧana emes, keler ūrpaqtyŋ da kemeŋgerıne ainalǧan tūlǧa.
Baba ösietı halqymyzdyŋ bırlıgın nyǧaityp, jas ūrpaqtyŋ jarqyn keleşegıne qyzmet ete beruıne tılektestık bıldıremın», – dep atap öttı oblys äkımı Ashat Şaharov qūttyqtau sözınde.
Al Aqtöbenıŋ Aqşat tūrǧyn alabynda qūrylǧan etnoauylda 60 kiız üi tıgıldı. Şaranyŋ resmi aşyluy A.Jūbanov atyndaǧy qazaq ūlt aspaptar orkestrınıŋ oryndauyndaǧy Möŋke bidıŋ «Qiqu däuren» küiımen bastaldy. Öŋır basşysy Ashat Şaharov qūttyqtau söz söilep, qonaqtarmen bırge etnoauyldy aralady.
20 myŋnan asa qonaq ūlttyq taǧamdardan däm tatyp, qolöner şeberlerınıŋ körmesın tamaşalap, qazaqy salt-dästürdıŋ körınısterıne kuä boldy.
Möŋke bidıŋ 350 jyldyǧy tek öŋır tūrǧyndary üşın emes, bükıl el üşın maŋyzdy oqiǧaǧa ainalyp, qazaq halqynyŋ ruhani mūrasyn, tarihi jady men mädeni bolmysyn saqtaudyŋ maŋyzdylyǧyn aiqyndap otyr.
