Qytaı Tájikstanǵa áskerı baza salyp bermek

2515
Adyrna.kz Telegram

Tájikstan bıligi Qytaı Taýly Badahshan avtonomııalyq oblysynda áskerılendirilgen baza salatynyn, ol Tájikstan qaýipsizdik kúshterine tıesili bolatynyn málimdedi dep habarlaıdy "Adyrna" ulttyq portaly "Azattyq Radıosy" qyzmetine silteme jasap. 

Bul qaýipsizdik nysany Aýǵanstandy tálipterdiń basyp alýyna baılanysty Tájikstan ishki ister mınıstrligi men Qytaı qaýipsizdik mınıstrligi arasyndaǵy kelisim aıasynda salynady.

Taýly Badahshan avtonomııalyq oblysy Qytaı jáne Aýǵanstanmen shekaralas ornalasqan. Tájikstan Ishki ister mınıstriniń birinshi orynbasary Abdýrahmon Alamshozoda 27 qazanda parlamentte nysannyń Taýly Badahshan avtonomııalyq oblysy Ishqashym aýdanyna qarasty Vahan aýylynda salynatynyn habarlady.

Parlament Májilisiniń depýtaty Tolıbhon Azımzoda bul arnaıy baza Tájikstannyń Ishki ister mınıstrligine qaraıtynyn aıtty. Onyń aıtýynsha, bazany salý kezinde Tájikstanǵa Qytaıdan ákelinetin barlyq qural-jabdyqtar men tehnıkalar kedendik baj salyǵynan bosatylǵan. "Qurylys bıýdjeti 55 mıllıon qytaı ıýanyna baǵalanady, bul shamamen 100 mıllıon somonıge teń", - dedi depýtat.

 

"Adyrna" ulttyq portaly

Pikirler