Aqtóbede «Qoǵam quqyqtyq tártipti qoldaıdy» atty forým ótti

1775
Adyrna.kz Telegram

27 qazan kúni Aqtóbede «Qoǵam quqyqtyq tártipti qoldaıdy» atty forým ótti. Forým qorytyndy jasap, jurtshylyqty quqyqtyq tártipti qorǵaýǵa jáne qoǵamda quqyqbuzýshylyqqa «nóldik tózimdilikti» qalyptastyrýǵa baılanysty ári qaraıǵy josparlardy talqylaıtyn dıalog alańyna aınaldy.

Forýmdy uıymdastyrǵan – Aqtóbe oblysynyń ákimdigi men oblystyq prokýratýra.
Onyń jumysyna óńir basshysy Ońdasyn Orazalın, quqyq qorǵaý organdarynyń basshylary, máslıhat hatshylary, quqyqbuzýshylyqtyń aldyn alý jónindegi vedomstvoaralyq komıssııanyń músheleri, oblystyq Qoǵamdyq keńes ókilderi, oblystyń joǵarǵy oqý oryndarynyń, uıymdar men kásiporyndarynyń basshylary qatysty. Oblys aýdandarynyń delegattary forýmǵa onlaın túrde qatysty.

2019 jyly Aqtóbe oblysynda qoǵamdy quqyqbuzýshylyqtyń aldyn alýǵa tartatyn, elde balamasy joq biregeı joba bastalǵan bolatyn. Joba vedomstvoaralyq jospar túrinde júzege asyrylýda. Onda memlekettik organdardyń jurtshylyqpen ózara áreket etýi, halyq jasaǵyn qurý, jastardyń eriktiler qozǵalysy jelisin damytý, qoǵamdyq birlestikterdi, joǵary oqý oryndary men eńbek ujymdaryn quqyqtyq tártipti qamtamasyz etý boıynsha birlesken jumystarǵa tartý qarastyrylǵan.

Oblys ákimi: «Josparǵa sáıkes qoǵamdyq kómekshiler ınstıtýtyn qaıta jańǵyrtý sharalary da turǵyndar tarapynan oń qabyldandy. Pılottyq rejımde aýdandar anyqtalyp, qoǵamdyq kómekshilermen birlese reıdtik sharalar júrgizile bastady. Jalpy ulttyq quqyqbuzýshylyqtyń aldyn alýda myńǵa jýyq azamat qoǵamdyq kómekshilermen birge reıdtik sharalarǵa qatysqan jáne olardyń qatysýymen 600-ge jýyq quqyqbuzýshylyq anyqtalyp otyr, ıaǵnı osy baǵytta atqarylyp jatqan jumystyń nátıjesi bar»,- dep atap ótti.

Qylmystyń aldyn alýda qoǵamdyq keńistikterdi abattandyrý, eldi mekenderdi jaryqtandyrý jaǵy da mańyzdy.

«Ózderińiz baıqaǵan bolarsyzdar, sońǵy kezderi qalamyzdaǵy kóptegen aýlalardyń abattandyrylyp, jaryqtandyrylyp, kóshelerdiń jóndelýine erekshe mán berip kelemin. Ásirese, Temirjol vokzaly mańyndaǵy úılerdiń aýlalary kóp jyldardan beri jaryqsyz, qaraýsyz qalyp, túrli qylmystyń oshaǵyna aınalǵan bolatyn. Jyl basynan beri júıeli júrgizilgen jumystyń nátıjesi retinde osy aýdandaǵy birqatar aýlalar abattandyrylyp, kósheler jóndelip, balalar alańdary, jaryqshamdary ornatyldy. Bul osy aýdanda bolatyn túrli qylmystyń aldyn alýda paıdasy óte kóp. Jalpy qalamyzdyń qaýipsizdigi, turǵyndardyń quqyq buzýshylyqtarǵa beı-jaı qaramaı jumyla atsalysýy, aınalamyzdyń tazalyǵyn saqtaý ortaq is. Búgingi forým birlesken jumystyń basy, aldaǵy ýaqytta jalǵasyn tabady dep senemin»,- dedi oblys ákimi.

Joba aıasynda azamattyq qoǵam ınstıtýttaryn tartý qalalyq aýmaqtardy patrýldeý, turmystyq zorlyq-zombylyqtyń aldyn alý jáne oblys aýdandarynda qylmystyń krımınologııalyq taldaýyn jasaý sııaqty úsh negizgi baǵyt boıynsha júrgizilip jatyr.
Prokýratýranyń málimeti boıynsha, jobany júzege asyrý oń nátıjesin bergen.
«Bıyl joba qamtyǵan qoǵamdyq oryndar men jaısyz otbasylarda qylmystyń tómendegeni nemese joqtyǵy baıqalady. Mártók aýdanyndaǵy krımınologııalyq taldaýdyń usynystaryn oryndaý da aýdandaǵy qylmystyń barlyq túrin edáýir tómendetýge múmkindik berdi»,- dedi oblys prokýrory Marat Qaıybjanov.

Aıta keteıik, krımınologııalyq taldaý qazirgi tańda oblystyń basqa aýdandarynda da júrgizilip jatyr.

Forýmda belsendi qoǵamdyq kómekshiler men olardyń jetekshileri marapattalyp, Aqtóbe hrom qosyndylary zaýytynyń qyzmetkerleri qaladaǵy aýdandardyń birin patrýldeýge belsendi qatysyp júrgendigi aıtyldy. Búginde kásiporyndarmen qoǵamdyq tártipti saqtaý úshin qyzmetkerlerdi bólý jóninde barlyǵy 15 memorandým jasalǵan. Atalǵan jobaǵa taǵy 80 kásiporyndy tartý josparlary bar. Atalmysh jobaǵa jýyrda taǵy seksendeı kásiporyn qosylady dep josparlanyp otyr.

 

«Adyrna» ulttyq portaly

Pikirler