Men oqyp jatqan tildik kýrsta ár qurlyqtan kelgen ár ulttyń ókilderi bar. Ádettegideı 20 stýdenttiń beseýi qytaı.
Sabaq arasynda áńgime, neden bastalyp ketkeni esimde joq, Shyńǵyshan taqyrybyna oıysty. Uly qaǵan jaıly ózge ulttar, ózge qurlyqtyń adamdary asa saýatty emes eken. Qyzyǵýshylyq ta tanyta qoıǵan joq. Biraq, qytaıdyń bir-birinen alshaqtaý oblystarynan kelgen bes qytaı da "Shyńǵyshan – qytaı" degen pikirge tabandy jáne qudaıdaı senedieken.
Men olardyń qytaıdyń esebine jyǵyp berip, burmalanǵan tarıh oqýlyqtaryn mektepte sabaq retinde oqyǵanyn jaqy bilem. Sondyqtan da Shyńǵyshandy qytaı degenine asa tań qala qoıǵan joqpyn. Onyń ústine Suń ımperııasyn tarıh taǵynan taıdyryp, búkil shyǵys azııaǵa yqpalyn júrgizgen Qubylaı jáne ol qurǵan Iýýan ımperııasy úshin de olar Shyńǵyshandy táýeldeýge qumar. Azdap mádenıet pen tarıhtan saýaty bar adam bul aqıqattyń astaryn seze qoıady.
Biraq meni tań qaldyrǵan múlde basqa jaǵdaı. Daý qyza kelgende men olarǵa kitaphanaǵa baryp tarıhı kitaptardy oqyp áýre bolmaı-aq, «Baıdý百度»-dan emes, «Google-ge» súıenip derekter izdep kórýin ótindim (Qytaıdaǵy ınternetten izdeý júıesi tek osy baıdýǵa ǵana súıenedi. Al GOOGLE jáne osy kompanııaǵa qatysty barlyq qurylǵy bul memlekette buǵattalǵan). Árıne, aınalasy bes mınýtta Shyńǵyshannyń qazaq bolmasa da, onyń qytaı emes ekenine kózi ábden jetetin derekterdi kórip kózderiniń alaqandaı bolǵany edi. Olardyń júzindegi tańdanys beıne asyrandy balanyń otyz jyl boıy ózin baǵyp-qaqqan adamnyń bıologııalyq ata-anasy emes ekenin álde kimnen estip turǵan sátindeı edi. Olar muny qabyldaı almaıdy eken. Báribir moıyndaǵan joq. Kózi jetti, kóńili páseıdi. Biraq, júzderinde «bul múmkin emes» degendi bildiretin yzaly tańyrqaý áli bar.
Mine, Shyńǵyshandy táýeldep, onyń tulparynyń tuıaǵy tıgen jerdiń bárin menshikteýdi urpaq sanasynda shegemen qaqqandaı etip ornatyp tastaǵan bul ıdeologııa – beıne, DIN sekildi. Kóńilderine kúmán, kúdik túsip turǵan sátte de bul senimnen eshqashan myzǵymaıdy.
Qaısar QAÝYMBEK,
FB-daǵy paraqshasynan
