Shymkenttik zeınetker Túrkistan qalasyna ekologııalyq taza kólikpen jetpek. 81 jastaǵy Keńesbek Seıdinbekuly bul saparyn el Táýelsizdiginiń 30 jyldyǵyna arnap otyr. Belsendi aqsaqaldy perzentteri, nemere-shóbereleri men qalalyq sport basqarmasynyń ókilderi, jastar shyǵaryp saldy.
Zeınetker Túrkistan qalasyna Temirlan, Qyzyl kópir, Sháýildir eldimekenderi arqyly jetýdi josparlaǵan. Jolaı Qajymuqan kesenesine soǵyp, jergilikti turǵyndarmen júzdespek. Osylaısha 220 shaqyrym joldy velosıpedpen basyp ótip, Túrkistan qalasyna senbi kúni jetýdi kózdep otyr.
– Velosıped teýip kele jatqanyma 70 jyldan asty. 10 jasymda ákemniń inisi Jolymbek velosıped syılap, aq batasyn bergen edi. Sodan beri salaýatty ómir saltyn ustanamyn. Jastar da belsendi bolsa eken deımin. Al basty tilegim – Shymkent sııaqty iri qalalardyń halqy jergilikti basshylardyń bastamasymen ár jeksenbini velosıpedke arnap, buqaralyq sportpen aınalyssa, – deıdi Keńesbek aqsaqal.
Jıhankez eń alǵashqy alys saparyna 2001 jyly shyqqan. Túrkistannyń 1500 jyldyǵyna oraı Ózbekstan, Túrkmenstan, Iran, Irak, Kýveıt arqyly Mekke-Mádınaǵa 63 kúnde jetken. 2003 jyly Qazaqstan-Reseı jylyna oraılastyryp Shymkentten Máskeýge barsa, 2016 jyly Qazaqstan táýelsizdiginiń 25 jyldyǵy qarsańynda Shymkentten Aýǵanstan astanasy Kabýlǵa eki dóńgelekti kóligimen jetken eken. Al 2017 jyly «EKSPO» qurmetine Shymkent–Astana baǵytyn baǵyndyrǵan.
