«Nur-Sultan qalasynyń Jastar saıasaty máseleleri basqarmasy» MM qoldaýymen, Halyqaralyq «Qazaq tili» qoǵamy Nur-Sultan qalasy fılıalynyń uıymdastyrýymen «Internattan keıingi jetim balalar men ata-anasynyń qamqorlyǵynsyz qalǵan balalardy beıimdeý jáne qoldaý» jobasy aıasynda atqarylyp jatqan ister kóp. Sonyń biri balalar úıi túlekterine «Balyq berme, qarmaq ber» prınıpi negizinde bilim berý kýrstary uıymdastyrylǵan bolatyn. Búgingi kúni osy baǵytta aǵylshyn tili, túrik tili, kolorıstıka, SMM jáne kopıraıtıng negizderi tárizdi kýrstar óz jumystaryn bastap ketti.
Sonymen qatar, jastar tarapynan suranysqa ıe kýrstardyń biri –tiginshilik ónerin úıretý kýrsy bolatyn. 2021 jyldyń 18 qyrkúıeginde joba jetekshisi Larısa Aldabergenova men joba koordınatory Ahmetova Álııa osy kýrsqa qatysamyn dep qyzyǵýshylyq bildirgen túlekterdi elimizge tanymal dızaıner, «Zeken moda» otandyq brendiniń negizin qalaýshy Ábishev Qaırollanyń dızaın stýdııasyna aparyp, jumys barysymen tanysýyna múmkindik jasady. Óıtkeni, tanymal dızaınerdiń ortalyǵynda sheberlik kýrsynan oqyp, bilim alýńa degen jastardyń yntasy zor. Qyzyǵýshyly mol, ynta-peıili qyzý jastar ózderine bolashaqta tiginshilik pen dızaınerliktiń qyr-syryn úıretetin tigin ortalyǵy mamandarymen kezdesip, pikir almasty.
Kezdesý barysynda Larısa hanym atalǵan joba aıasynda jastarǵa úsh aılyq kýrs qarastyrylǵandyǵyn, alaıda osy bastamaǵa degen jastar tarapynan úlken qoldaý, qyzyǵýshylyq bolatyn bolsa, bolashaqta jalǵastyrý joldaryn qarastyratyndyǵyn tilge tıek etti.
Kezdesýge qatysqan Jumaǵazına Ajar tiginshilik kýrsynyń jumys ýaqytynan tys jáne demalys kúnderi uıymdastyrylýy yńǵaıly bolatyndyǵyn, ózderiniń kúndizgi ýaqytta jumysta ekendigi týraly tilegin bildirdi. Tiginshilikti úıretýshi mamandar jastarǵa múmkindiginshe kómektesip, keshki mezgilde, demalys kúnderi de úıretýden jalyqpaıtyndyqtaryn jetkizdi.
Jýnýsova Almıra bolsa, buryn tiginshilikpen aınalysqandyǵyn, biraq óz betinshe úırengendikten, kásibı deńgeıge jete almaǵandyǵyna toqtalyp, elimizdiń tanymal dızaınerinen kásibı tigin ónerin úırený múmkindigin jasaǵan joba uıymdastyrýshylaryna jyly lebizin bildirip, alǵysyn aıtty.
Osyǵan oraı, «Qazaq tili» qoǵamy Nur-Sultan qalasy fılıalynyń jumysy da jetim balalardy kóptep tartý. Sol negizde jastardyń yntasyn arttý maqsattar kóptegen jumystar júrgizilýde.
Jalpy alǵanda, jastardyń alǵa qoıǵan maqsattary oryndalyp, elimizdiń myqty kıim brendterin qalyptastyryp, óz kásipterin dóńgeletip áketip jatsa, atalǵan jobanyń alǵa qoıǵan maqsattarynyń bir parasynyń oryndalǵany. Al biz jastarǵa jol kórsetip, qoldaýdan sharshamaıyq!
