Reseı prezıdenti Vladımır Pýtın 17-qyrkúıek kúni Memdýma saılaýyna onlaın daýys berdi. Ol saılaýǵa tikeleı qatysa almady, sebebi onyń janyndaǵy birneshe adamnan koronavırýs anyqtalǵan bolatyn. Soǵan baılanysty Reseı basshysy Novo-Ogarevoda oqshaýlaný rejımin ustanýda.
Kreml baspasózi Pýtınniń onlaın daýys berip jatqany beınelengen vıdeony jarııalady. Onda Pýtın kompıýter aldyna otyryp, pernetaqtany eki ret basady. Al sol sátte ekranda "Rahmet, sizdiń daýysyńyz sanaldy" degen jazý shyǵady.
BAQ bul vıdeoǵa barynsha muqııat nazar aýdardy. Sebebi Pýtınde uıaly telefon bolmaǵan, al onlaın daýys berý úshin telefonnyń bolýy mindetti. Sebebi telefonǵa arnaıy SMS arqyly kod keledi. Bul jaıtqa baılanysty Peskov Pýtın janyndaǵy kómekshileriniń telefonyn qoldanǵanyn aıtty. Al Tvıtter qoldanýshylary Pýtınniń qolyndaǵy saǵatta 10-qyrkúıek dep turǵanyn ańǵarǵan. Atalmysh faktilerge qarap Pýtın onlaın daýys bermegen, vıdeony bir apta buryn daıyndap, júkteı salǵan degen pikirler aıtylýda.
Peskov Pýtınniń saǵatynda rasymen basqa kún turǵanyn, alaıda ol daýysty 17-qyrkúıekte onlaın bergenin aıtty. "Pýtın kúndi saǵattan qaramaıdy" dedi ol.
"Adyrna" ulttyq portaly
