Covid-19 pandemııasy kezinde zııan shekken stýdentterdiń bolashaqta alatyn tabysy 2,9% qysqarýy múmkin dep habarlaıdy "Adyrna" ulttyq portaly "informburo.kz-ke" silteme jasap.
"ERDO" AQ dırektory Aleksandra Molchanovskaıanyń aıtýynsha, bul jaǵdaı stýdentterdiń lokdaýn kezinde onlaın formatta bilim alyp, kóptegen aqparattyń qoljetimsiz bolýymen baılanysty.
"Aldaǵy ýaqytta 85 mıllıon jumys orny arnaıy mamandar kómegimen avtomattandyrylatyn bolady. Bul avtomattandyrý proesi óńdeý, kólik jáne bank qyzmetine baılanysty. Búgingi tańda qarapaıym bankomat pen uıaly telefon bank operatorynyń mindetin alyp otyr. Mamandar sanyna qatysty qysqarý bolady desek te, jańadan qurylatyn jumys oryndarynyń sany olardan da kóp bolady. Biraq burynǵy jumystarǵa qaraǵanda áldeqaıda qıyn. Óıtkeni, qyzmetkerden basqa daǵdylar talap etiledi. Jalpy suranysqa ıe maman bolý úshin úzdiksiz bilim alýǵa daıyn bolý qajet. Tipti, ómir boıy bilim alýǵa desek te bolady. Al keıbireýiniń mamandyǵyn túbegeıli aýystyrýyna týra keledi", – dedi Aleksandra Molchanovskaıa.
Ári qaraı ortalyq dırektory álemde jáne Qazaqstanda jastar sanynyń artyp kele jatqanyna toqtaldy.
"Qazirgi daǵdarys jaǵdaıynda jastar jaǵy pandemııanyń taralýyna qarsy shekteý sharalary, oqý, oqytýdyń jańa formatyna beıimdelý jəne bilim berý resýrstaryna qoljetimdilik turǵysynan úlken qıyndyqtarǵa tap boldy. Olarǵa qatysty "lokdaýn urpaǵy" degen halyqaralyq uǵym paıda boldy. Pandemııa kezinde jastardyń aldynan shyqqan qıyndyqtar bolashaqta olardyń eńbek naryǵynda jumysqa ornalasý múmkindikterin shekteýi múmkin. Dúnıejúzilik banktiń baǵalaýy boıynsha, bolashaqta Qazaqstanda Covid-19 pandemııasynan zııan shekken stýdentterdiń kirisi shamamen 2,9 paıyzǵa qysqarady. Bul 1,9 mıllıard AQSh dollary kóleminde jalpy jyldyq ekonomıkalyq shyǵyndarǵa alyp keledi", – dedi Aleksandra Molchanovskaıa.
"Adyrna" ulttyq portaly.
