QR Táelsizdiginiń 30 jyldyǵy aıasynda Shymkentte ótip jatqan nysana kózdeýden Azııa chempıonaty qyza tústi. 13 jáne 14 qyrkúıek kúni el qorjynyna birqatar júldeler tústi.
13 qyrkúıek kúni pnevmatıkalyq tapanshada 10 metrge atý jattyǵýy boıynsha komandalyq syn óz máresine jetti. Bul synda Qazaqstan erler quramasy Azııa chempıony atandy. Eldar Imanqulov, Vladımır Isachenko jáne Valerıı Rahımjan qarsylastarynan úzdik shyqty. Ekinshi orynǵa Saýd Arabııasy, úshinshi orynǵa Qyrǵyzstan quramasy ıelik etti.
Jasóspirimder arasynda 10 metrge tapanshamen kózdeý jattyǵýy boıynsha da Qazaqstan komandasy jeńimpaz atandy. Iaroslav Mahnev, Alekseı Lotarev, Nıkıta Chırıýkın úshtigi eń kóp upaıǵa ıe boldy. Ekinshi oryndy Ózbekstan, úshinshi oryndy Qyrǵyzstan sportshylary jeńip aldy.
Sondaı-aq, keshe pnevmatıkalyq tapanshamen 10 metrge nysana kózdeýden synǵa túsken Olga Aksenova qola júldeger atandy. Ol 215.3 upaı jınaǵan. Altyn jáne kúmis medaldi Taıland eliniń sportshylary ózara bólisti.
Aıta ketsek, Azııa chempıonaty 20 qyrúıekke deıin jalǵasady.
