Nazarbaev pen Tramptyń kelissózinde qandaı máseleler talqylanýy múmkin ekeni belgili boldy

2647
Adyrna.kz Telegram

QR Prezıdenti janyndaǵy Qazaqstan strategııalyq zertteýler ınstıtýty dırektorynyń orynbasary Sanat Kóshkinbaev Nursultan Nazarbaev pen Donald Tramptyń AQSh-taǵy kelissózderi kezinde qandaı máseleler qozǵalýy múmkin ekenin aıtty, dep habarlaıdy QazAqparat.

 

«Munda bizdiń AQSh-pen yntymaqtastyqty keńeıtilgen strategııalyq áriptestik deńgeıine kóterýdi maqsat etetinimiz jaıly sóz bolyp otyr. Qurama Shtattar – bizdiń burynnan, elimiz táýelsizdigin alǵan kezden bergi strategııalyq áriptesimiz. Aıtpaqshy, qańtarda eki el arasyndaǵy dıplomatııalyq qarym-qatynastardyń 26 jyldyǵy atalyp ótedi. AQSh – Qazaqstannyń iri saýda-ekonomıkalyq, ınvestıııalyq áriptesi. Saıası turǵydan biz óńirlik jáne jahandyq qaýipsizdik máselelerin qozǵaý jáne sheshý boıynsha yntymaqtasyp kelemiz.

Atap aıtqanda, Aýǵanstan máselesi kelissózderdiń eń mańyzdysy bolady, budan basqa Sırııa máselesi de bar. Reseımen qarym-qatynastar AQSh-tyń eýrazııalyq strategııasy aıasynda talqylanady», – dedi Sanat Kóshkinbaev.

Sarapshynyń sózine qaraǵanda, kelissózder kezinde AQSh pen Qazaqstan tek saýda-ekonomıkalyq yntymaqtastyq emes, qaýipsizdik salasyna qatysty máselelerdi de talqylaý múmkindigine ıe.

«Árıne ıadrolyq qarýǵa qarsy aspekt turaqty nazarda bolady, óıtkeni AQSh ákimshiligi Qazaqstannyń ıadro qarýyn taratpaý salasyndaǵy kóshbasshylyǵyn únemi joǵary baǵalap keledi. Onyń ústine Koreıa túbegindegi oqıǵalar kelissózderde osy máseleni qozǵaýdyń ózektiligin arttyra túsedi», – dedi ol.

Sonymen qatar Sanat Kóshkinbaev Nursultan Nazarbaevtyń BUU Qaýipsizdik Keńesi otyrysyna qatysýy týraly aıtty. Onyń sózine qaraǵanda, bul Qazaqstannyń BUU Qaýipsizdik Keńesine qańtardaǵy tóraǵalyǵy kezeńindegi oqıǵalardyń sharyqtaý shegi bolmaq.

«Atalǵan debattar ıadrolyq taratpaý sııaqty máselesine arnalýy kerek. Sizder Qazaqstannyń 1990 jyldary ózin ıadrolyq qarýsyzdaný jónindegi jahandyq qozǵalystyń kóshbasshylarynyń biri retinde kórsetkendigin bilesizder. Biz uıymnyń sheteldik seriktesteriniń joǵary baǵasyn aldyq jáne olardyń qoldaýyna ıe boldyq. Osy turǵydan alǵanda Qazaqstannyń joǵarydaǵydaı bastamalarmen shyǵýyna moraldyq quqy bar. Aıta ketetin másele, debatqa BUU-nyń Bas hatshysy Antonıo Gýtterısh qatysýy kerek»,-dedi QSZI tóraǵasynyń orynbasary.

Sondaı-aq, Qazaqstannyń BUU Qaýipsizdik Keńesine tóraǵalyǵynyń aıasynda ótetin mańyzdy sharalardyń biri retinde Sanat Kóshkinbaev ózara áreket etý, qaýipsizdik pen damýdyń úlgisi retinde Ortalyq Azııa men Aýǵanstanda óńirlik seriktestik qurý máselesine arnalǵan debatty atady. Ol sózinde atalǵan debattardyń maqsaty zor ekenin atap ótti. Sebebi onda Aýǵanstandy ekonomıkalyq jáne saýda baılanystaryna tarta otyryp, saýyqtyrý jáne osy áreket arqyly atalmysh eldi óńirdegi kórshileri úshin ashyq ári pragmatıkalyq etý máselesi qaralady.

«Bul bastamany aýǵan tarapy qoldap otyr jáne ony óte nátıjeli shara dep esepteıdi»,-dedi ol.


Stan.kz

Pikirler