30 tamyz - Konstıtýııa kúni jáne QR Táýelsizdiginiń 30 jyldyǵy aıasynda Shymkent qalasynda 220 kV elektr qýatyn beretin «Bozaryq» qosalqy elektrstanııasy iske qosyldy.
Energokeshenniń ashylýyna qala ákimi Murat Áıtenov qatysyp, buqaralyq aqparat quraldary ókilderine nysannyń strategııalyq mańyzy jóninde maǵlumat berdi.
Qurylystyń sońǵy satysynda keshenge elektr qýaty berilip, 72 saǵattyq merzimde tehnıkalyq synaq jumystary júrgizilip, sátti ótken.
"Bozaryq" qosalqy elektr stanııasy negizgi keshen sanalyp, ol qýaty 110/35/10 kV bolatyn 5 qosalqy elektr stanııalarynyń qosylý kózi bolyp tabylady. Osy keshennen qýat alatyn «Nursát», «Astana-1», «Astana-2» qosalqy stanııalarynyń qurylystary aıaqtalǵan. «1-M-1» stanııasynyń qurylysy jalǵasyp jatsa, «Yntymaq» qosalqy stanııasynyń joba-smetalyq qujatyn ázirleýge tapsyrys berilgen.
Keshenniń iske qosylýymen Asar-2, Turan, Yntymaq-2, Soltústik saıajaı, Batys, Bozaryq, Qaınarbulaq, Shymkentsıtı, Dostyq, Nursát shaǵyn aýdandarynda elektr qýatynyń sapasy artady.
"Memleket basshysynyń tapsyrmasy boıynsha salynǵan bul keshen 250 myńnan astam halyqty sapaly elektr energııasymen qamtıtyn bolady. Qalamyz iri óndiristik ortalyq retinde qalyptasyp otyr. "Bozaryq" elektr stanııasy strategııalyq nysan retinde shahardaǵy elektr qýatynyń jetispeýshiligin sheshedi", - dedi M.Áıtenov.
Aıta ketý kerek, "Bozaryq" qosalqy elektr stanııasy qalanyń qurylysy qarqyn alǵan soltústik bóligin elektr qýatymen qamtamasyz etpek. Munda jańa shaǵyn aýdandar boı kóterip, jańa óndiristik aımaqtyń irgesi qalanǵan.
Shymkent qalasynyń ákimdigi
