Ózbekstan prezıdenti Shavkat Mırzııoev Navoı oblysyna sapary kezinde Aýǵanstandaǵy jaǵdaı týraly aıtty. Onyń sózderiniń aýdıojazbasyn zańger jáne Ulttyq aqparat agenttigi basshysynyń orynbasary Hýshnýdbek Hýdaıberdıev jarııalady.
"Biz Talıbanmen ózara keńesýdi keshe emes, eki jyl buryn bastadyq. Eshqandaı el áli olarmen baılanysqa shyqpaǵan soń, men: "Biz olarmen dıalog ornatýymyz kerek" degen nusqaýlyq berdim. Eger siz teledıdardan kórseńiz, olardyń Dohadaǵy kóshbasshysy Mýlla Abdýl Ǵanı Barodar jeke sóılep, Ózbekstan halqyna, Ózbekstanǵa birde-bir oq atylmaıdy dep ýáde berdi", - dedi Shavkat Mırzııoev.
"Ol óz sózinde turǵandyqtan, bizdiń olarmen qarym-qatynas jasaýymyz qalypty jaǵdaı. Men óz halqyma tynyshtyqty qalaımyn, men kez kelgen adammen dıalog júrgizemin. Tek ózbek halqynyń tynyshtyǵyna, Ózbekstannyń tynyshtyǵyna áser etetin faktor bolsa ǵana, men onyń kim ekenine qaramastan habarlasamyn", - dedi prezıdent.
Ol eki jyl buryn Aýǵanstanda dál osyndaı oqıǵalar bolatynyn boljaǵanyn aıtady. Prezıdent Ózbekstannyń qorǵanys kúshi kez kelgen oqıǵaǵa, qaýipke daıyn ekenine sendirdi: "Árıne, Aýǵanstandaǵy jaǵdaı bárimizdi oılandyrady. Ýaıymdamańyzdar, bizdiń qorǵanys kúshimiz kez kelgen jaǵdaıǵa daıyn, biz barlyǵyn baqylaýdamyz", - dedi ol.
"Adyrna" ulttyq portaly
