BŪŪ Qauıpsızdık Keŋesındegı töraǧalyǧy kezınde Qazaqstan 20-ǧa juyq şarany ötkızudı josparlap otyr. Osylaişa, bır aidyŋ ışınde xalyqaralyq qauıpsızdıkke arnalǧan bıraz mäseleler talqylanbaq, dep xabarlaidy QazAqparat halyqaralyq agenttıgı.
"Bızdıŋ töraǧalyǧymyz aiasynda ötetın maŋyzdy şaralardyŋ bırı - jappai qaru-jaraqty taratpauǧa arnalǧan taqyryptyq brifing. Atalǧan brifing 18 qaŋtarda ūiymdastyrylady. Oǧan BŪŪ Bas xatşysy Antonio Guterrestıŋ özı kelıp, söz söilemekşı. Qauıpsızdık keŋesınıŋ basqa da tūraqty jäne tūraqty emes müşelerı qatysady. Būdan bölek, Qazaqstan özara senım şaralaryna basymdyq jasaidy. Sebebı bügınde xalyqaralyq qauymdastyqta, äsırese, ırı derjavalar arasynda senım tapşylyǧy barynşa baiqalady. Onsyz tiımdı yntymaqtastyqty damytu mümkın emes. Sol sebeptı bız aldaǧy brifingte atalǧan ekı mäselege basa nazar audaramyz", - dedı QR Syrtqy ıster vise-ministrı Erjan Aşyqbaev bügın Astanada ötken baspasöz mäslixatynda.
Josparǧa säikes, 19 qaŋtarda BŪŪ Qauıpsızdık keŋesı aiasynda ministrlıkter pıkırtalasyn ūiymdastyru josparlanǧan. Taqyryby - Ortalyq Aziia men Auǧanstanda aimaqtyq ärıptestıktı damytu. Būdan bölek, gumanitarlyq kömek beru mäselesı keŋınen talqylanady. Sebebı bügınde älem boiynşa ondai kömektıŋ kölemı azaidy. Jalpy, Qazaqstannyŋ töraǧalyǧy aiasynda 16 şara ūiymdastyrylady. Sol kezde Siriia, İrak, Sudan, Liviia, Mali, Kongo, Iemen jäne Kipr mäselelerın talqyǧa salu josparlanyp otyr.
"Şyny kerek, BŪŪ Qauıpsızdık keŋesınıŋ töraǧalyǧy Qazaqstan diplomatiiasy üşın ülken synaq. Būl da täjıribe, būl da mektep. Degenmen, bız ol synaqqa daiynbyz", - dep atap körsettı E.Aşyqbaev.
Aita keteiık, 1 qaŋtardan bastap Qazaqstan tarihta tūŋǧyş ret Bırıkken Ūlttar Ūiymynyŋ Qauıpsızdık Keŋesı Töraǧasynyŋ ökılettılıgın oryndauǧa kırıstı. Osyǧan orai, Qazaqstannyŋ BŪŪ janyndaǧy Tūraqty ökıldıgınde aldaǧy jūmys jospary talqylandy.
18 qaŋtarda jappai qyryp-joiu qarularyn taratpauǧa arnalǧan joǧary deŋgeidegı taqyryptyq brifing ötedı. Oǧan bırqatar elderdıŋ basşylary men ministrlerı qatysady. Brifingte Qazaqstan Prezidentı Nūrsūltan Nazarbaev söz söileidı degen jospar bar. Qazaqstannyŋ töraǧalyǧy 31 qaŋtarǧa deiın jalǧasady.
Arman Asqarov,
QazAqparat
