«Mereıli otbasy» ulttyq konkýrsynyń Shymkent qalasyndaǵy jeńimpazy anyqtaldy. Kópke ónegesimen úlgi januıa Qarataý aýdanyndaǵy Álıevter otbasy. Júzden júırik shyqqan shańyraq ıeleri endi respýblıkalyq dodada baq synamaq. Úzdikterge qala ákiminiń birinshi orynbasary Shyńǵys Muqan 500 000 teńgeniń srtıfıkatyn tabystap, aqtyq synǵa joldama berdi.
Túrik januıasy kóz ashqaly qazaq jerin ataqonysy dep biledi. Otbasynda qazaq dástúrin qatań saqtap, memlekettik tilde sóıleıdi. Áýlet kópshilikke «Alıevter ansambli» retinde keńinen tanymal. Ulttyq ónerdi ata kásipke aınaldyrǵanyna 50 jyldan asqan. Qazaqtaı darhan eldiń eldigi men teńdigin jyrǵa qosqan januıa Shymkenttik otbasylar arasynan úzdik dep tanyldy. Aıta keteıik, jyl saıyn elimizdiń ár óńiriden 2 jeńimpaz otbasy anyqtalsa, bıyl respýblıkaǵa bir otbasy joldama aldy.
Bashat Alıev – Shymkent qalalyq «Mereıli otbasy» baıqaýynyń jeńimpazy
Mereıli otbasy baıqaýyna qatysýǵa bıyl Shymkent qalasy boıynsha 110 otbasy ótinim bildirgen. Olar otbasyndaǵy tárbıe men tanymyn, januıalyq jetistikterin vıdeorolık arqyly beıneledi. Qatysýshylardyń ónerin qaladaǵy 4 aýdannan qurylǵan komıssııa músheleri saralap, aýdandyq irikteý ótkizdi. Nátıjesinde qazaqylyqty qanyna sińirip, saltty saqtap, dástúrdi dáriptep júrgen ónerli otbasy mereıli otbasy atandy.
Shyńǵys Muqan –Shymkent qalasy ákiminiń birinshi orynbasary
Mereıli otbasy ulttyq baıqaýy januıalyq baqyt pen shattyqty úlgi etip, qazaq otbasynyń ozyq úlgisin anyqtaıtyn dástúrli shara. Byltyr karantındik talaptarǵa sáıkes uıymdastyrylmady. Degenmen, bul joly qatysýshylar belsendi ári sany da basym boldy.