Máskeýde ózbekstandyq mıgranttar men kavkazdyqtar arasynda jappaı tóbeles boldy. Tóbeleske qatysýshylardyń úsheýi ustaldy, olarǵa «Buzaqylyq» jáne «Qasaqana denege jaraqat salý» baptary boıynsha qylmystyq is qozǵaldy. Sondaı -aq olardyń qarý qoldanǵany da tekserilý ústinde. Tóbeles saldarynan birneshe adam aýyr jaraqat alyp, aýrýhanaǵa jetkizilgen.
Oqıǵa Pogranıchnaıa kóshesinde bolǵan. Kýágerlerdiń aıtýyna qaraǵanda bastapqyda tóbeles bolyp, artynsha atys bastalǵan. Turǵyndar polıııa shaqyrǵan soń, tóbeleske qatysýshylar oqıǵa ornynan qashyp ketken.
Boljam boıynsha qarýdy qaqtyǵysqan eki jaq birdeı qoldanǵan. Readovka telegram kanaly oqıǵanyń keıbir egjeı-tegjeıin tarqatyp jazdy. Derek kóziniń aıtýynsha, tóbeles ózbekter men sheshender arasynda bolǵan. «Bul tóbeleske meniń týystarym, meniń dostarym qatysty. Barlyǵy sheshenstandyq 3 jigitke 24 ózbek pyshaq jáne soıylmen shabýyl jasaǵan kezde bastaldy. Osyny bilgen bizdiń basqa jigitter birigip, bunyń kegin alý úshin bardy», - deıdi áleýmettik jelide tóbeleske qatysy bar taraptyń ókili. Alaıda mıgranttarǵa qysym kórsetken degen de aqparattar bar. Sońǵy ýaqytta Máskeýde eńbek mıgranttary arasynda atys-shabys, janjal jıilep ketken. "Bul bıliktiń isi" deıtin de jandar sany artýda.
"Adyrna" ulttyq portaly
