Búgin Atyraýda «Jasyl el» XVII eńbek maýsymynyń resmı ashylýy ótti.
Saltanatty ashylý rásimi Atyraý oblysy jastar saıasaty máseleleri basqarmasynyń qoldaýymen Jastar saıabaǵynda ótti. Sharaǵa Atyraý oblysy ákiminiń orynbasary Baqytgúl Hamenova qatysyp, aımaq basshysy Mahambet Dosmuhambetovtyń atynan «Jasyl el» jastarynyń jumysyna sáttilik tiledi.
– «Jasyl el» eńbek jasaqtarynyń jyl saıyn mańyzy artyp, tanyla túsýde. 2005 jyly Elbasy N. Á. Nazarbaevtyń bastamasymen qurylǵan «Jasyl el» baǵdarlamasyna bıyl 17 jyl tolyp otyr. Atyraý oblysynda sońǵy 5 jylda 8 myńnan astam jas jumyspen qamtylsa, ótken jyly 1 myńnan asa jas «Jasyl el» baǵdarlamasy boıynsha qyzmet etip, nápaqasyn tapty. Bul joba – eń tabysty jáne aýqymdy áleýmettik jobalardyń biri. Bul – jastarmen jumys jasaýdyń óte mańyzdy quraly. Olardyń óz Otanyna degen súıispenshiligin oıatyp, ózderin týǵan jerdiń ıesi sezinýge jeteleıdi. Taza eńbekpen nápaqa taýyp, ata-anany qýantýdy da osy eńbek jasaǵyndaǵy alǵashqy eńbekteri arqyly sezine alady. Jumystaryńa sáttilik tileımin, – dedi Baqytgúl Hamenova.
Bıyl «Jasyl El» baǵdarlamasy boıynsha myńnan astam jas atyraýlyq jumysqa ornalasady.
– Jańa maýsymǵa tirkeý onlaın-rejımde tamyz aıynyń sońyna deıin júrgiziledi. Atap aıtqanda, jeke kýálik, 20 tańbaly «Kaspi Gold» nómiri, sondaı-aq eger jumysqa turýshy 18 jasqa tolmaǵan bolsa, ata-anasynyń ruqsaty qajet bolady. Eńbek etýshi jastardyń bári qolǵaptarmen, betperdelermen qamtamasyz etiledi, qashyqtyqty saqtaı otyryp jumys isteıtin bolady. Eńbek jasaǵy sarbazdarynyń jalaqysy 65 myń teńge bolady, – dedi oblystyq «Jasyl El» eńbek jasaǵynyń jetekshisi Abylaı Qurmetuly.
