Qazaqstan Mūsylmandary Dıni basqarmasy (QMDB) koronavirusqa qarsy ekpe saluǧa qatysty mälımdeme jasady, dep habarlaidy «Adyrna» ūlttyq portaly.
«Qūrmettı otandastar! İslam dınınde adamnyŋ ömırı men densaulyǧynan asqan qūndylyq joq. Sondyqtan ärbır adam öz densaulyǧyna asa män beruı qajet. Alla Taǧala «Baqara» süresınıŋ 195-aiatynda: «Özderıŋdı öz qoldaryŋmen qauıp-qaterge salmaŋdar», – dep būiyrǧan. Alla Elşısı (oǧan Allanyŋ salauaty men sälemı bolsyn): «Emdelıŋder, rasynda Alla ärbır derttı şipasymen qosa jaratty», – degen. Dana halqymyz: «Auyryp em ızdegenşe, auyrmaityn jol ızde», – dep şipa ızdeuge ündegen. Sol üşın kez kelgen adam emdeludıŋ jäne aurudyŋ aldyn alu joldaryn qarastyruy tiıs. Arnaiy medisina mamandary qazırgı taŋda älemge qauıp töndırgen koronavirus ındetınıŋ aldyn alu üşın vaksinasiialaudyŋ adam densaulyǧyn saqtap qaludyŋ qauıpsız jäne tiımdı ädıs ekenın aituda. Al şariǧat boiynşa zäru jaǧdaida ekpe saluǧa bolady. Alaida ekpe saldyru – är azamattyŋ öz erkı. Özderıŋızge belgılı, älemde jäne elımızde pandemiialyq jaǧdai kün saiyn kürdelenude. Jūqpaly dertten bır otbasynda bırneşe adam jan tapsyruda. Būl jaǧdai ekpe saldyruǧa qatysty oŋ şeşım qabyldau qajettıgın körsetıp otyr. Osy rette halyqty barynşa saqtanyp, densaulyǧymyz ben ömırımızdı saqtap qalu üşın ekpe saldyruǧa ündeimız. Alla Taǧala halqymyzdy jūqpaly ındetten saqtap, nauqas jandarǧa şipa näsıp etsın! Ämin!», - delıngen QMDB resmi saitynda.
"Adyrna" ūlttyq portaly
Ūqsas jaŋalyqtar
