Zamanymyzdyń kórnekti jazýshysy, aqyn, dramatýrg Sofy Smataevtyń jary Shámshııa Smataeva ómirden ótti dep habarlaıdy "Adyrna" ulttyq portaly.
Bul aqparatty qazaq radıosynyń sandýǵashy atanǵan dıktor Saýyq Jaqanova rastady.
«Jýyrda ǵana Sofy aǵamyzdyń 80 jyldyq mereıtoıynda jeńgemizben kezdesip, dastarqandas bolǵan edik. Ol kisi sondaı aqjarqyn, meıirimdi, kópshil adam edi. Men óz ómirimde ol kisini eki-aq ret kórdim. Ol kisiniń bolmysy ózgeshe edi. Sofy aǵamyzdy erekshe syılaıtyn, jaǵdaıyn jasap, qas-qabaǵyna qarap otyratyn. "Kóp nárse shyǵarmashylyq adamynyń ómirlik jaryna baılanysty" degen sóz bar, sol sııaqty Sofy aǵamyzdyń osyndaı ataq-abyroıǵa jetýine otbasyndaǵy jarynyń da úlesi zor dep oılaımyn. Qaraly habardy estip, biraz qaıǵyryp qaldyq. Alla aldynan jarylqasyn", — dedi S.Jaqanova.
Shámshııa Smataeva jaıly basylym betterinde kóp derek bolmasa da, ol kisi týraly Sofy aǵamyzdyń bir suhbatynda aıtqany el jadynda saqtalyp qaldy dep oılaımyz. Ol:
«Jan jarym – aq bantıgi kóz aldymda kóbelekteı kólbeńdegen, jastaıymyzdan bir aýylda birge ósip, bir úmitke birge ilesken, bir armandy birge ańsaǵan Shámshııa hanym. Qos júrektegi ystyq ińkárlikti qosyp alyp, aq otaýymyzdy kóterip aq ordaǵa aınaldyrdyq desem, artyqtaý bolmas ta. Shekten tys kóbeıgen yńqyl-syńqylymnyń, kesel-dertimniń emshisi – jan jarym, Shákemniń-Shahmınamnyń báıek bolǵysh tirligi, aıalaǵysh alaqany», — degen bolatyn.
Sondaı-aq ol zaıybymen ómirde tatý-tátti ǵumyr keship, Almas, Manas, Janar esimdi ul-qyz ósirgenin aıtqan.
Biz jazýshy aǵamyzǵa, onyń otbasyna, týǵan-týystaryna qaıǵylaryna ortaqtasyp kóńil aıtamyz.
"Adyrna" ulttyq portaly.
