Qalanyń órkendeýine úles qosqandarǵa «Shymkent qalasynyń qurmetti azamaty» ataǵy berildi

2829
Adyrna.kz Telegram

Búgin qala kúni merekesine oraı «MEREKEŃMEN, ShYMQALA!» atty saltanatty is-shara ótti. Merekelik jıynda eńbegi eleýli azamattarǵa qurmet kórsetildi.

Shymkent qalasy máslıhatynyń kezekten tys besinshi sessııasynda 20 qala turǵyny «Shymkent qalasynyń qurmetti azamaty» atanǵan bolatyn. Olar Shymkenttiń áleýmettik-ekonomıkalyq jáne mádenı damýyna eleýli úles qosyp, qoǵamdyq qyzmette belsendilik tanytqany úshin osy atqa laıyq dep tanyldy. Biri zeınetker-ustaz, biri ımam bolsa, endi biri professor men kásipker.

Shymkent qalasynyń ákimi Murat Áıtenov osynaý marapatqa ıe bolǵandardy quttyqtap, izgi tilegin jetkizdi.
– Elbasynyń tarıhı Jarlyǵyna sáıkes, 2018 jylǵy 19 maýsymda Shymkent qalasy respýblıkalyq mańyzy bar qala statýsyna ıe bolǵan edi. Odan beri tup-týra 3 jyl ýaqyt ótti. Qala kúni – ótkendi saralap, búgindi baǵalap, erteńge boljam jasaıtyn mereıli mereke. Sońǵy 3 jyldyń kórsetkishterine zer salsaq, bul kóregen sheshim qalanyń ekinshi tynysyn ashty dep aıtýǵa ábden bolady. Birinshiden, qala bıýdjeti 3,6 esege ósip, 131,2 mlrd teńgeden bıyl 481 mlrd teńgege jetti. Investıııa kólemi sońǵy úsh jylda eki esege jýyq ósip, 214 mlrd teńgeden bıyl 400 mlrd teńgege jetedi. 2025 jylǵa deıin qaladaǵy negizgi ınjenerlik ınfraqurylym máselesi sheshiledi. 3 jyl buryn 402,5 myń sharshy metr turǵyn úı berilse, bıyl bir mıllıonǵa jetkizýdi josparlap otyrmyz.

Táýelsizdiktiń 30 jyldyǵy qarasańynda osyndaı jetistikterdiń berik irgetasyn qalaǵan, Shymqalamyzǵa únemi qamqorlyq kórsetip otyrǵan Elbasymyz Nursultan Ábishuly Nazarbaevtyń Shymkent qalasynyń damýyndaǵy tarıhı rólin atap ótýimiz qajet. Memleket basshysy úshinshi megapolıstiń qarqyndy damýyna qatysty naqty tapsyrmalar berip, bıik mejeler men mańyzdy mindetterdi belgilep berdi. Shymkentti halyqqa qolaıly qala ete túsý baǵytyndaǵy osynaý jasampaz jumysqa barshańyzdy atsalysýǵa shaqyramyn. Qalamyzdyń qarqyndy damýyna qosyp jatqan úlesterińiz úshin barshańyzǵa sheksiz alǵysymdy bildiremin, – dedi qala ákimi.

Qala ákimi Murat Áıtenov, Shymkent qalasy máslıhatynyń hatshysy Bahadyr Narymbetov qalanyń damýyna úles qosqan azamattardy marapattap, arnaıy tósbelgini tabys etti. Murat Dúısenbekuly marapattaý sátinde eńbegi sińgen azamattardyń bárine erekshe qoshamet kórsetti.
Saltanatty is-shara odan ári merekelik konertke ulasty.

Shymkent qalasy ákimdiginiń baspasóz qyzmeti

Pikirler