Shardara Aýdanyndaǵy qurǵaqshylyq sharýalarǵa óte aýyr tıip jatyr

1280
Keshe Shardara Aýdanynda bolyp, qurǵaqshylyqtan shańy shyǵyp qulazyǵan dalany kórdim. Tisterge shóp tappaı 40 gradýs ystyqta dala kezip, aıaqtaryn silbip basqan "kóterem" qoılardyń kóshin kórdim.
Qabyrǵalary yrsyıyp-yrsyıyp ketken jylqylar júr.
Al, shópti tilimen jeıtin sıyrlardy múldem kórmedim. Óıtkeni, tilmen orap jeıtin shóp túgili, tisimen tartyp jeıtin shóp joq dalada.
Janymdaǵy Shardaranyń jigitteriniń aıtýynsha, dál qazir maldyń basy jarty baǵasyna arzandap ketken. Óıtkeni, "óletin kúni sanaýly" aryq maldy alatyn adam joq. Satpasa, asyraıtyn shóbi joq.
Neshe jyl ter tógip jınaǵan maldaryn bolmashy aqshaǵa satyp, barynan aırylǵysy kelmegen sharýalar, qudaıǵa amanat etip úmittengennen basqa amaldary joq. Onyń ústine mundaı shań jutyp, ystyqqa qatalaǵan aryq maldardyń bolashaqta ońalyp ketýi qıyn. Óıtkeni, bir-eki aıda "ókpe" aýyraýyna ushyrap, qystan aman shyǵýlary ekitalaı. Sondyqtan, ózge jaqtyń mal alýshylary da osyny eskerip, bul jaqtyń maldaryn alýǵa qulyqsyz deıdi.
Bul áli jaz aıy bastalmaı jatqandaǵy ahýaly osyndaı. Erteń shilde túsip, kúz bolǵansha ne bolmaq?
Al, qysta she?
Ózimniń Tólebı Aýdanymda prestelgen shóptiń bir danasynyń baǵasy 800-1000t-niń arasynda satylýda. Byltyr 500-600 t aralyǵynda bolǵan. Iaǵnı, ártúrli faktorlardyń áserinen bıyl 30-40%-dyń ústinde qymbattaǵan. Al, baǵany retteýge, sharýalarǵa baǵa máselesinde shekteýlerdi eshkim qoıa almaıdy. Óıtkeni, erkin naryq zańy boıynsha baǵany suranys belgileıdi.
Ári, sharýalarǵa shóptiń baǵasyn belgileýde úkimettiń olarǵa mindet qylar eshteńesi joq. Eshkimniń kómeginsiz ózi ósirgen shóbin, óziniń qalaýynsha suranysqa baılanysty óz baǵasyn qoıyp satýǵa sharýalar tolyq haqyly.
Osy oraıda birneshe zańdy suraq týyndaıdy.
1) Mal azyǵyn daıyndaýmen aınalysatyn sharýalardy sýbsıdııamen qamtamasyz etý qanshalyqty júıelengen?
2) Qansha qarjy, qaıda bólinip otyr?
3) ASh mınıstirligi myna juttan sharýalardy qalaı alyp shyqpaqshy?!
("Bıýdjetten aqsha bólip ár aýdanda qurbandyqqa mal soıyp, Qudaıdan jańbyr tileıik!" demeıtin shyǵarsyzdar. Óıtkeni, ár óńirde ondaı joralǵylar jasalyp qoıdy. Úmit ózderińizde.)
Respýblıkalyq antıkordyń jańa basshysynyń málimdeýi boıynsha, ASh salasyna bólingen sýbsıdııalardyń 54%-y zańsyz rásimdelgen eken.
Iaǵnı, ASh salasyna bólingen sýbsıdııalardyń jartysynan astamy, "joq sharýashylyqtarǵa" bólinip ketken deýge tolyq negiz bar.
Mal bir juttyq degen osy!
Jut kelgende tisterge shóp tappaı qańǵyrǵan mal men shóptiń baǵasynyń sharyqtaýyna baılanysty Shardara Aýdandyq Aýylsharýashylyq Bólimi men Túrkistan oblysy Aýyl sharýashylyǵy basqarmasy
QR Aýyl sharýashylyǵy mınıstrligi / Mınısterstvo selskogo hozıaıstva RK bul máseleni sheshýdiń qandaı joldaryn qarastyryp jatqanyn bilgim keledi.
Sondyqtan, Nurlan Álimbaev  baýyrym!
Ózińniń Shardara aýdanynyń Qurmetti azamaty, bilikti jýrnalıst ekenińdi bilemin.
Ýaqyt tapsań osy máseleni birlese zerttep, arnaıy materıal daıyndaýǵa qalaı qaraısyń?
Osy máseleni "Ashyq alańda" talqylaýdy usynamyn.
QR Premer-Mınıstri resmı saıty
Rústem ÁShETAEV,
"Adyrna" ulttyq portaly 
Pikirler
Uqsas jańalyqtar