Qazaqstan men Qytaı Qorǵas ózeninde birlesken Dostyq sý elektr kesheninde sý qoımasyn salýdy josparlap otyr, dep habarlaıdy «Adyrna» ulttyq portaly Ekologııa mınıstrliginiń baspasóz qyzmetine silteme jasap.
Bul sý qoımany salý úshin jobalyq-smetalyq qujattama daıyndaldy. Bul sheshimdi sý resýrstary komıtetiniń «Kazvodhoz» RMK bas dırektory Altaı Eljasov aımaqqa jumys sapary barysynda qabyldady.
Dostyq sý elektr kesheni Qytaımen shekarada, Qorǵas transshekaralyq ózeninde ornalasqan. Keshen 2013 jyly qoldanysqa berildi. Onyń aýmaǵy 14,5 myń gektardy quraıdy. Al qurylymnyń syıymdylyǵy - 456,0 m3/s.
Úkimettiń aıtýynsha, keıingi úsh jylda kórshi memleketten azdaǵan aǵyn sý kelip, klımattyq aýytqý bolǵan. Atalmysh máseleni sheshýdiń jalǵyz joly – Qorǵas ózenine sý qoımasyn salý bolyp otyr.
«Bizdiń aýdandaǵy basty máselelerdiń biri – sýarmaly sýdyń jetispeýshiligi. Bul ekologııalyq jaǵdaımen tikeleı baılanysty. Shyndyǵynda taýlarda muzdyqtardyń azaıýy baıqalady. Al bul sýdyń az mólsherde kelýine ákeledi. Eki el de osy ózen sýymen birdeı bólisedi. Alaıda jetkiziletin sý ózen arnasy boıymen ótetindikten, sý qoımasyn salý arqyly máseleni túbegeıli sheshýge bolady», – dedi «Kazvodhoz» Almaty fılıalynyń Panfılov óndiristik ýchaskesiniń bastyǵy Turysbek Nurahmetov.
Jergilikti ákimdik atalmysh jobany úkimet pen Ekologııa, geologııa jáne tabıǵı resýrstar mınıstrliginiń qaraýyna jiberedi dep kútip otyr. Al Qazaqstan úkimeti Qytaımen sýdy bólý týraly kelissózder júrgizýdi bastap ketti.
"Adyrna" ulttyq portaly
