Ózge ulttan 18 bala asyrap alǵan ana: Balalarym qazaqsha sóıleıdi

3144
Adyrna.kz Telegram

Kentaýda ózge ulttan 18 balany baýyryna basqan ana turady, dep habarlaıdy «Adyrna» tilshisi Habar 24-ke silteme jasap.

Túımekúl Ergeshqyzy jas kezinde baýyrlaryn jetildiremin dep júrip, ózi turmys qurmaı qalǵan. Keıin balaly bolýdy armandap, túrli ulttyń 18 balasyn asyrap alyp, baýyryna basqan. Búginde úlken bes perzenti óz aldyna otaý qursa, kenjesi nebári eki jasta. Kentaýlyq kásipker Túımegúl Ergeshqyzy 33 jasynda alǵashqy qyzyn asyrap alypty. Tipti ózge ulttyń 18 balasyn asyrap alamyn degen oı úsh uıyqtasam túsime kirmegen deıdi. Barlyǵy Allanyń qalaýymen bolǵanyn aıtady. Qazir perzentteriniń aldy aıaqtanyp, úıli bolǵan. Úlken úsh qyzyn uzatyp, eki ulyn úılendirgen. Olardan tórt nemere súıip otyr.

«Táýekel dep osy joldy tańdadym. Qudaıǵa shúkir. Baqyttymyn. At basyndaı altyn berse de, aıyrbastamaımyn eshkimge. Balalarymnyń ishinde ulty basqa balalar da bar. Qazaǵy bar, ózbegi bar, orysy bar, kárisi bar degendeı. Bári qazir qazaq, qazaqsha sóıleıdi»,–deıdi ol.

Ózi de kópbalaly otbasynda ósken ana bala baǵyp, tárbıeleýdiń ońaı emestigin jasyrmaıdy. Qınalǵan sátterimdi balalaryma kórsetpeýge tyrysamyn deıdi. Bastapqyda anasy kómektesse, qazir úlkenderi kishilerge qamqorshy bolady. Biri sabaǵyn oqytsa, endi biri úıdiń jumysyna qolqanat.

«Baýyrlarymnyń kóp bolǵany jaqsy eken. Aǵam aqyl aıtady. Ápkem durys joldy kórsetedi. Inilerimmen oınaımyz, qaryndastaryma kómektesemin»,–deıdi Túımegúl Ergeshqyzynyń uly Erasyl Belıaev.

Jastaıynan kásipkerlikpen aınalysyp, tabandylyq, qajyrlylyqpen tabysqa qol jetkizgen ana perzentterin de eńbekke baýlyp júr. Uldaryna kólik jóndeý men dánekerleýdiń qyr-syryn úıretedi. Úıdegi qurylys jumystaryn da birlesip isteı beredi. Al qyzdary dúken men dámhananyń jumysyn júrgizýge kómektesedi.

«Adyrna» ulttyq portaly

Pikirler