Beıbitshilik jáne kelisim saraıynda Qazaqstan halqy Assambleıasynyń Alǵys aıtý kúnine arnalǵan forýmy ótip jatyr, dep habarlaıdy Baq.kz.
Forýmǵa Memlekettik hatshy Gúlshara Ábdiqalyqova, QHA tóraǵasynyń orynbasary – Hatshylyq meńgerýshisi Eraly Toǵjanov memleket organdarynyń basshylary, QHA músheleri, etnomádenı birlestikterdiń ókilderi qatysýda.
Mańyzdy jıynda Gúlshara Ábdiqalyqova elbasy Nursultan Nazarbaevtyń Alǵys aıtý kúnine arnalǵan quttyqtaý sózin oqyp berdi.
«Alǵys aıtý kúni – bul bizdiń memlekettik jáne qoǵamdyq kúntizbemizde jaqynda ǵana paıda bolǵan erekshe kún. Alaıda atalǵan jas merekeniń tarıhı tamyry tereńde jatyr. Ol meıirimdilik, raqymdylyq, bir-birine kómek pen ózin-ózi qurban etý syndy adamnyń eń asyl qasıetteri kórinis tapqan almaǵaıyp zamandy eske salady.
Alǵys aıtý kúnin atap óte otyryp, biz, bir jaǵynan, halqymyzdyń rýhanı qaharmandyǵyna qurmet kórsetip, ótkenge kóz júrgitemiz. Ekinshi jaǵynan, adamgershiliktiń negizderi arqyly jol tartylǵan bolashaqqa zor senimmen qaraımyz.
Biz otanymyzdyń áleýetin meılinshe eseleı túsýge kómektesetin tabystarymyz ben syn-qaterlerge rızashylyq bildiremiz», - delingen hatta.
Sonymen qatar elbasy Qazaqstan halqyna alǵys aıtyp, olardy merekemen quttyqtady.
«Men táýelsiz elimizdi birlesip quryp jatqan Qazaqstan halqyna yntymaǵy men erik-jigeri úshin alǵys aıtamyn. Qaıyrymdylyq pen ózara kómek kórsetý dástúriniń odan ári nyǵaıa túsetinine senimdimin. Alǵys aıtý kúnimen barshańyzdy shyn júrekten quttyqtaımyn! Barlyqtaryńyzǵa baqyt, otbasylaryńyzǵa ıgilik, dostyq pen ósip-órkendeý tileımin», - delingen hatta.
"Adyrna" kz
