Qazaqstanda üş ai būryn üidıŋ de baǧasy qymbattady. Bıraq ükımettegıler tiımdı türde üi aluǧa bolatyn 7-20-25, Nūrly jer, Baspana Hit sekıldı baǧdarlamalardy jalǧastyra beretının aitady, dep habarlaidy Adyrna ūlttyq portaly Stan.kz saityna sılteme jasap.
Ūlttyq Bank töraǧasy Erbolat Dosaev bügın «Baspana Hit» baǧdarlamasyna bölınetın qarjyny 600 milliard teŋgege deiın ösırıp, ony jyl soŋyna deiın igerudı josparlap otyrǧanyn aitty. «Mamyr men mausym ailarynda baspana qūny bır retke keledı» degen sarapşylardyŋ da boljamy oryndalmauy mümkın. Öitkenı qazır qūrylys materialdary qymbattap ketken.
Jyl basynan berı zeinetaqy qorynan aqşasyn aluǧa 210 myŋ qazaqstandyq ötınış berıptı. Olarǧa 1 trillion teŋgeden astam aqşa bölınıp qoiǧan. Ol aqşanyŋ 99,4 prosentı üi satyp aluǧa nemese ipotekany jabuǧa jūmsalǧan. Üş ai būryn baspananyŋ qymbattap ketkenı de sodan.
İpotekalyq tūrǧyn üi zaimdaryn qaita qarjylandyratyn kompaniianyŋ mamany Aibar Oljaev «endı ekınşı naryqtaǧy üiler de, jaŋa baspanalar da arzandamaidy» deidı.
«Däl qazır üi baǧasy tüsedı dep aita qoimaimyn. Kvadrat metrı mysaly 300 myŋ bolsa aqyryndap 310 myŋ bolady, sosyn 320 myŋ bolady. Sol jalpy üidıŋ baǧasyna 500 myŋ, milliondap qosyla beredı. Syrttan aldyratyn qūrylys materialdary qatty qymbattaǧan. Ol valiutanyŋ kursyna bailanysty», - deidı «Qazaqstannyŋ ornyqtylyq qory» AQ Syrtqy bailanystar qyzmetınıŋ bas menedjerı Aibar Oljaev.Iаǧni üige kerektınıŋ barlyǧy bızge şetelden keledı. Sondyqtan eşbır qūrylys kompaniiasy qymbattaǧan qūrylys materialynan salynǧan üidı arzanǧa bermeidı.
«Üidıŋ baǧasyn eşkım arzandata almaidy, tek memleket päterlerdı köptep salyp, üi satuşy kompaniialarǧa bäsekeles bola alsa ǧana baǧa azdap tüsuı mümkın», - deidı maman.Al sapasy biznes klastaǧydai bolmasa da Ükımet jylda milliondaǧan şarşy metr päter salady. Qaŋtardan berı memlekettık baǧdarlamamen 23,663 baspana berılgen. Jyl soŋyna deiın ükımettegıler 17 million şarşy metr üidı paidalanuǧa beremız dep otyr.
«Aǧymdaǧy qaŋtar-nauryzda 2,9 mln şarşy metr tūrǧyn üi paidalanuǧa berıldı. Būl ötken jyldyŋ kezeŋınen 8,6 paiyzǧa joǧary. Pavlodar oblysynan basqa barlyq öŋırler oŋ ösım körsettı. Tūrǧyn üidı eŋ köp 5,9 ese paidalanuǧa beru Şymkent qalasynda baiqaldy», - deidı ūlttyq ekonomika ministrı Äset Erǧaliev.Al, ūlttyq statistika biurosyndaǧylar nauryzda 52,673 üidı satyp alu-satu kelısımşarty jasalǧanyn, būl ötken jylmen salystyrǧanda 2,4 esege köp ekenın jariialady. Iаǧni, üige degen sūranys ai saiyn ösıp keledı. Ötken aida baspana satyp alǧan 52 myŋnan astam qazaqstandyqtyŋ 40 myŋy köpqabatty üiden päter alypty. Eŋ köbı Maŋǧystau oblysynyŋ tūrǧyndary: bır aidyŋ ışınde 9852 adam baspana satyp alǧan. Al, Soltüstık Qazaqstan oblysynda kerısınşe, üi alǧandar az: 687 adam. «Jyl soŋyna deiın 17 million şarşy metr üidı paidalanuǧa beremız» degen şeneunıkter bügın Ükımet otyrysynda naryqta üidıŋ baǧasy nelıkten qymbattaǧanyn, taǧy qalai qūbyluy mümkın ekenın aitpady.
