Qazaqstanǵa Kenesary hannyń bas súıegin qaıtarmaqshy. Bul týraly Facebook paraqshasynda tarıhshy Zııabek Qabýldınov málim etti, dep habarlaıdy “Adyrna” ulttyq portaly.
”Men uly hannyń bas súıegin qaıtarý úshin qurylǵan sarapshylar komıssııasynyń quramyna kirdim. Búginnen bastap ulttyq tarıhymyzdyń múlde jańa kezeńi bastalady. Búgin yntymaǵy jarasqan eki memleket Reseı men Qazaqstan arasyndaǵy qarym-qatynas tarıhynda jańa deńgeıge ótemiz, dostyǵymyz odan ári nyǵaıyp, beıbit qarym-qatynas tereńdeı túspek.
Men Reseıdiń Mádenıet mınıstrligi tarapynan Kenesary hannyń bassúıegin qaıtarý jumystary boıynsha reseılik sarapshylar komıssııasynyń quramyna shaqyrtý aldym. Kelistim. Súıinshi! Kenesary hannyń bassúıegi tabyldy! Men onyń qalaı tabylǵany nemese onyń qaı jerde jatqany týraly názik nárselerdi jetkize almaımyn. Ol belgili bir resmılikti talap etedi jáne ol dıplomatııalyq deńgeıdegi dúnıe.
Biraq bul bastamany Reseıdiń joǵary bılik ókilderi kóterip otyrǵany anyq!”, – dep jazdy tarıhshy Zııabek Qabýldınov.
