Túrkııa Respýblıkasy Din isteri basqarmasynyń tóraǵasy Alı Erbashpen kezdesýde mınıstr A.Balaeva Túrkııa ýnıversıtetterinde Qazaqstan musylmandary dinı basqarmasynyń jiberýimen qazaqstandyq teologtardy daıarlaýdaǵy yntymaqtastyqty odan ári tereńdetý men nyǵaıtýǵa múddelilik bildirdi, dep jazady «Adyrna» ulttyq portaly.
Jumys sapary barysynda ásirese Túrkııanyń teledıdar naryǵynyń jetekshilerimen ótkizgen kezdesýlerge erekshe mán berildi. Atap aıtqanda, "TRT" memlekettik tele-radıokompanııasynyń basshysy Ibrahım Erenmen, Túrkııanyń "Anadolu" aqparattyq agenttiginiń basshylyǵymen jáne Stambýldaǵy teleserıaldar túsirý alańynyń dırektory Iaheı Taıp Aıdenızben kezdesýler ótti. Mınıstrlik birlesken kontent qurý, onyń ishinde ortaq túrki mádenıeti men tarıhyn tanymal etý máseleleri boıynsha televızııalyq ónimderdiń túrik óndirýshilerimen yntymaqtastyǵynyń kólemi men sapasyn arttyrýǵa daıyn.
Aıta keteý kerek, "Qazaqstan" RTRK men Túrkııanyń "TRT" memlekettik tele-radıokompanııasy arasynda "Qorqyt ata" birlesken televızııalyq jobasyn qurý týraly kelissózderdi bastaý týraly kelisimge qol jetkizildi. Sondaı-aq, Túrik tarapy túsirgen Qoja Ahmet Iassaýı týraly telehıkaıanyń kórsetilimi Qazaqstan kórermenderine de taıaý arada kórsetiletini belgili boldy.
Televızııalyq mamandardyń tájirıbe almasýy aıasynda Aıda Balaeva Túrkııanyń jetekshi mamandaryn qazaqstandyq áriptesterin oqytýǵa jáne úıretýge shaqyrdy. Ol bul baǵyttaǵy jumysty pandemııa kezindegi epıdemıologııalyq jaǵdaı turaqtalǵannan keıin oflaın-formatta uıymdastyrýǵa bolatyndyǵyn atap ótti. Mınıstr Túrkııanyń medıa salasy men shyǵarmashylyq toptarynyń ókilderin osy jyly iske qosylǵan "Turkistan" telearnasynyń jobalaryna qatysýǵa shaqyrdy.
Mınıstr Aıda Balaeva Túrkııa Prezıdenti Ákimshiliginiń qoǵammen baılanys jónindegi Bas basqarmasynyń basshysy Fahrettın Altýnǵa shaqyrtý úshin alǵys aıtyp, ony QR "Aqparat salasynyń úzdigi" tósbelgisimen marapattady. Ol Qazaqstan men Túrkııany Elbasy Nursultan Nazarbaev pen Prezıdent Qasym-Jomart Toqaev erekshe nazar aýdaryp otyrǵan dostyq qarym-qatynastar baılanystyratynyn atap ótti.
QR AQDM basshysy ózi basqaratyn vedomstvonyń jetekshilik etetin salalary boıynsha áriptestikti odan ári damytýǵa daıyndyǵyn jetkizdi.
