"Alataý" dástúrli óner teatrynda qazaqtyń ulttyq jyr-jaýharlarynyń kerýeni jalǵasýda. Arqa ólkesiniń «Injý marjan», Altaı-Tarbaǵataı jeriniń «Aǵajaı, Altaıdaı jer qaıda...» atty konerttik sharalarynan keıin, «Qanekeı tilim sóıleshi» dep atalǵan Syr boıynyń kúıshi, jyrshy-jyraýlarlyrynyń keshi ótti.
Syr elin «Súleıler eli» dep tegin atamasa kerek. Syr elinen shyqqan Eshnııaz sal, Balqy Bazar, Jıenbaı jyraý, Shoraıaqtyń Omary, Sársenbaı, Nurtýǵan, Turmaǵanbet, Kete Júsip, Dúr Ońǵar, Jańabergen, Budabaı, Nartaı sııaqty aqyn-jyraýlardan bastaý alatyn súleıler shoǵyryn olardyń keıingi býyn urpaqtary – Muzarap, Rústembek, Kósheneı, Shámshát, Arzýlla, Suraǵan, Rysbek, Bekuzaqtar bolsa, osy dástúrdi búgingi býyn jyrshy-jyraýlary laıyqty jalǵastyryp keledi.
«Kimniń batyr, kimniń baqyr ekenin jyraý biler» degen eken Qorqyt babamyz. Jyraýlyq dástúr tarıhynyń bastaý bulaǵy, sonaý Túrki dáýiriniń «Orhon Enıseı» jazýyndaǵy madaq jyrlarynan, «Oǵyznama», «Qıssas úl Ánbııa» jazba ádebıet muralarynan tamyr tartady.
Syr boıy ǵajap ólkesiń
Tolqısyń tyńdap termesin
Sııaqty syrda aqyndar
Jasaǵan jyrdyń kórmesin
Keremet ǵajap oılanam
Jyrmen tur tunyp aınalam
Ózgeshe syrdyń maqamy
Janyńdy jipsiz baılaǵan
Besikte balań bulqynǵan
Jelide taıyń julqynǵan
Jyr jınap alyp júrmin men
Kóshkende qalǵan jurtyńnan – dep sóz bastaǵan Kósheneı jyraýdyń uly Arnur Kósheneı aıtashy (júrgizýshi) bolǵan jyr men kúı keshinde Bıdas Rústembekov, Qurmash Júginisov, Uljan Baıbosynova, Ǵanıbek Ómirzaqov, Aqmaral Noǵaıbaeva, Erbolat Mustafaev, Bolat Baımuratov, Aqmaral Qaldanova, Serikqalı Jubanııazov, Ǵıbrat Jumaǵulov, Ázilhan Maqsatbaev, Álimjan Ábsadyqov, Beısenbek Tóleýbaev, Nurshat Aqbaeva, Aıbek Táńirbergenov, Zúlfııa Baımurzaeva, Qurmanbek Bekpeıisov, Muhamedáli Bekpeıisov, Aldııar Shaǵdatov, Nurtilek Aqtaev, Abylaıhan Ysqaqov, Elmura (Elmıra) Jańabergenovalar (jyrshy-jyraýlyq úsh mekteptiń de ókilderi) óner kórsetti.
Qysqy Ýnıversııada bastalǵaly beri konert tamashalaýǵa kelgen halyqtyń "Alataý" dástúrli óner teatryna degen yqylasy erekshe. Kún saıyn ár óńirdiń ánin tyńdap, shyn ónerpazdy tanyp jatyr.
