Álemdegi ataqty ýnıversıtetterdiń kóshin bastap turǵan Massachýsets tehnologııalyq ınstıtýty elordalyq Eldar Ýrkýmbaevqa grant usyndy, dep habarlaıdy «Adyrna» tilshisi.
Eldar – Nur-Sultan qalasyndaǵy Nazarbaev Zııatkerlik mektebiniń oqýshysy.
- Men Halyqaralyq Bakalavrıat baǵdarlamasynda oqyp jatqandyqtan, joǵary oqý oryndaryn taldaý barysynda AQSh ýnıversıtetterine basymdylyq tanyttym. Maǵan negizinen akademııalyq erkindik pen pánaralyq zertteý qaǵıdalaryn ustanǵan joǵary oqý oryndary unaıdy. Al bul AQSh-ta jaqsy damyǵan. Oǵan qosa, MIT ýnıversıteti AQSh jáne álemniń eń úzdik tehnıkalyq joǵary oqý oryndarynyń biri. MIT qaýymdastyǵynyń 88 múshesi Nobel syılyǵynyń laýreattary bolyp tabylady. MIT túlekteri Google, Oracle, Amazon, McKinsey Accenture, Apple, Boeing ı Microsoft syndy úlken kompanııalarda qyzmet etedi. Bundaı úzdik, bedeldi ýnıversıtetten shaqyrtý alý men úshin jáne meniń otbasym úshin zor qurmet, - dedi ol.
12-synyp oqýshysy óz bolashaǵyn bıologııa pánimen baılanystyryp otyr. Jas daryn bıologııadan respýblıkalyq olımpıadalarǵa úsh jyl qatysyp, NIS tobynyń múshesi retinde bir altyn jáne eki kúmis medaldarǵa ıe boldy.
Sonymen qatar, ol 2018 jyldan bastap mektepte olımpıadalyq bıologııadan oqýshylarǵa sabaq beredi.
Bolashaqta Eldar bıologııanyń tar sheńberli mamandyǵy boıynsha magıstratýraǵa túsip, sheteldik tájirıbe jınaqtaýdy josparlaýda.
Aıta keteıik, QS ýnıversıtetteriniń álemdik reıtıngisi boıynsha Massachýsets tehnologııalyq ınstıtýty rekordtyq kórsetkishin jalǵastyryp keledi. Bilim ordasy robototehnıka men jasandy ıntellekt sektorlary jáne aqparattyq tehnologııa, fızıka, hımııa jáne matematıka salalaryn oqytý júıeleri boıynsha eń tańdaýly bolyp sanalady. Sonymen qatar, ýnıversıtet menedjment, ekonomıka, lıngvıstıka, saıası ǵylymdar jáne fılosofııa salalaryn oqytýymen de tanymal.
«Adyrna» ulttyq portaly
