Aýyl balalary balabaqshada bilim alýda

830

Almaty oblysynyń Panfılov aýdanynda tutas bir aýyldyń balalary balabaqsha ǵımaratynda bilim alýda. Súptaıdaǵy eski oqý ordasy jylý júıesi durys bolmaǵandyqtan, 98-shi jyldary jabylyp, keıin apatty dep tanylǵan eken. Bul týraly Eýrazııa birinshi arnasy habarlaıdy.

NURÁLI MUSABEKULY, OQÝShY:

"Bizge jattyǵatyn oryn qajet. Jańa mektep qajet. Kitaphana qajet. Taǵy da óleń aıtatyn bólme qajet".

Bul 900-deı turǵyny bar Súptaı aýylyndaǵy burynǵy balabaqsha ǵımaraty. Munda 200-ge jýyq bala bilim alýda. Ótken ǵasyrdyń 80-jyldary salynǵan nysan osy kúnge deıin birde-bir ret kúrdeli jóndeý kórmepti. Tek ujymnyń kútimimen ǵana ishi-syrty bútin tur. Jyl ótken saıyn eskirip, toza bastaǵan. Tóbesinen sý ótedi. Irgetasy shógip, qabyrǵalary da jarylypty. Jalpy, bul ǵımarat mektepke beıimdelgeni bolmasa, eshqandaı talaptarǵa saı kelmeıdi.

Mektep dep aıtýǵa kelmeıtin shyǵar, árıne, bul balabaqsha ǵoı, árıne. Eshqandaı jaǵdaı jasalmaǵan. Oryndyqtar, bizdiń taǵy da basqa qoldanatyn zattarymyz tym eski. Osy ýaqytqa deıin biz eshqandaı zerthanalyq jumystar, aktovyı zal, sport zal, taǵy da basqa dúnıelerdi kórgen joqpyz. Árıne, bizge jaǵdaı jasalǵanyn qalaımyz".


AIGÚL TURSYNQYZY, MUǴALIM:

"Bir ǵana aktovyı zalymyz bar. Sol jerde deneshynyqtyrý sabaǵy da ótedi. Sol jerde qosymsha sabaq ta ótemiz. Sol jerde merekelik sharalar da ótedi. Sol janymyzǵa qatty batady".

Súptaılyqtardyń aıtýynsha, eldi mekende demografııalyq ósim jaqsy. Qazirdiń ózinde mektep jasyna deıingi 70 shaqty bala bar eken. Biraq, solardyń kóbisin balabaqsha ǵımaraty bola tura, ata-analary kórshi aýyldaǵy bóbekjaıǵa amalsyz tasymaldap júr.


TILEBALDY ShYNTAEV, SÚPTAI AÝYLYNYŃ TURǴYNY:

"4 km jerde Nádek degen aýyl bar. Taksımenen muǵalimder, basqa da sol aýyldyń turǵyndary balalaryn balabaqshaǵa aparyp tárbıelep jatyr. Bizge jańadan mektep salyp berse, bul balabaqsha bop qalsa, sonda halyqtyń turmys dárejesi de jaqsy bolar edi".

Aýylda mektep ǵımaraty joq emes, bar. 1970 jyldary salynǵan myna nysan toqyraý jyldary jylý júıesi durys bolmaǵandyqtan jabylyp qalǵan. Jyldar boıy qańyrap bos turǵandyqtan, osydan 10 jyl buryn apatty dep tanylǵan eken. Qazir tóbesi túsip, opyrylyp jatyr.

QÝANYSh TOQTASYNOV, PANFILOV AÝDANDYQ BILIM BÓLIMI BASShYSYNYŃ MINDETIN ATQARÝShY:

"Aýdanymyzda 3 apatty mektepten basqa, mektep qurylysyn salý qajet osy Súptaı aýylynda. Sondyqtan da biz bıylǵy jyly osy mekteptiń qurylysyn salýǵa jobalaý-smetalyq qujattaryna usynym daıyndap otyrmyz. Endi, zaman talabyna saı mektep salynsa, durys bolar edi. Negizgi ǵımaraty apatty jaǵdaıda. Sol sebepti, balalar balabaqsha ǵımaratynda bilim alýǵa májbúr bolyp otyr".

Osy kúnge deıin jobalaý-smetalyq qujaty jasalmaǵandyqtan, mekteptiń de qashan salynary belgisiz. Biraq, súptaılyqtar úshin jańa nysan aýadaı qajet bolyp tur. Óıtkeni, 120 oryndyq balabaqsha ǵımaraty balalarǵa barynsha tarlyq etýde. Onyń ústine aýylda ınternet te áreń ustaıdy. Qashyqtan oqytý kezinde oqýshylarmen qosa, ustazdar da qınalǵan.

Pikirler
Redakııa tańdaýy