Shyǵys Qazaqstan oblysynda bala kútimine baılanysty bir jylǵa deıin tólenetin járdemaqyny óz atyna rásimdegen er adamdar bul aqshany qaıtarýy tıis. Jalpy 254 er adam "dekrettik" járdemaqy alǵan. Endi olarǵa 200 mıllıon teńgeden astam somany qaıtarý jóninde talap qoıdy, dep habarlaıdy "Eýrazııa birinshi arnasy".
Memlekettik saqtandyrý qory ókilderiniń túsindirýinshe, bul tólemder negizsiz alynǵan. Al tıisti qarajatty alǵan otbasylar mundaı ýájben kelispeı otyr. Olar qujattardy rásimdeýge HQKO qyzmetkerleri kómekteskenin aıtady.
Solardyń biri – Dmıtrıı Jýravlev. Ol HQKO-ǵa kezekti ret kelgende memleketke 1 mıllıon teńgege jýyq bereshegi bar ekenin bilgen. Er adam osydan úsh jyl buryn bala kútimine baılanysty járdemaqyny óz atyna rásimdegen.
Ol týý týraly kýálikti rásimdep, járdemaqy jaıly aqparat alý úshin HQKO-na barǵanda, ortalyq qyzmetkeri zańnamaǵa tıisti ózgertýler engizilgenin, sondyqtan jalaqysy kóp ata-ananyń biri járdemaqyny rásimdeýge bolatynyn aıtqan.
"Sol jyldary tabysym joǵary edi. Men bul jańalyqqa qýanyp, aqsha aýdarymy da tıisinshe kóp bolady dep túsindim. Sodan barlyq tıisti qujatty jınap tapsyrdym", – deıdi Jýravlev.
Qńirde Jýravlev sekildi qujat tapsyrǵandardyń sany az emes. 254 otbasy dál osyndaı járdemaqyny otaǵasynyń atyna rásimdegen.
Memlekettik áleýmettik saqtandyrý qory oblystyq fılıaly narazylyq hat joldap, memleket aldyndaǵy qaryzyn óteý týraly habarlandyrǵan.
"Bul hat bizge 2 naýryz kúni keldi. Biz 10 naýryzǵa deıin 976 myń teńge tóleý kerekpiz. Bir aptanyń ishinde. Áleýmettik jelide de qoqan-loqy jasalyp jatyr. Bizdi alaıaq dep atap, qaryzdy tóleýimizdi talap etýde. Men tuńǵyshymdy bosanǵanda járdemaqyny óz atyma rásimdegenmin. Ekinshi balany dúnıege alyp kelgen soń HQKO qyzmetkeri járdemaqyny kúıeýimniń atyna rásimdeý týraly usynys jasaǵan?", – dedi ShQO turǵyny Tatıana Ermolaeva.
Bul máselege qatysty Shyǵys Qazaqstan oblysy boıynsha halyqqa qyzmet kórsetý ortalyǵynyń dırektory Azamat Esenbolov óz qyzmetkerleriniń kinásin tolyq joqqa shyǵaryp otyr.
"Biz eshqandaı usynys jasamaıyz. 700-den astam qyzmet túrin kórsetetindikten, qatań túrde bekitilgen standart bar. Eger azamat tıisti qujattar jıyntyǵyn alyp kelse, biz ony qabyldasaq, járdemaqyny taǵaıyndaý týraly sheshimdi biz emes, ýákiletti organ qabyldaıdy", – dedi Azamat Esenbolov.
Osy tusta ýákiletti organ retinde qyzmet usynatyn – memlekettik áleýmettik saqtandyrý qory sábılerdiń ákeleri negizgi tabysynan aıyrylmastan bala kútimine baılanysty járdemaqyny óz attaryna rásimdegenin alǵa tartty. MÁSQ munyń barlyǵyna zańdaǵy shıkilik sebepshi ekenin málimdedi.
"Osy 254 adamnyń basym bóligi sol kezdegi, ıaǵnı 2018 jyldyń qańtarynda qoldanysta bolǵan zańǵa sáıkes 2018 jyldyń birinshi jartyjyldyǵynda járdemaqyny rásimdegen. Ol zańǵa sáıkes MÁSQ fılıaly qujattardy tek standarttar tizimi boıynsha teksere aldy. Ol tizimde kiristi rastaıtyn qujat bolǵan joq. 2018 jyldyń 2 shildesinen bastap zańǵa ózgertýler engizilip, qor fılıaldaryna usynylǵan qujattar men málimetterdiń durystyǵyn tekserý quzyreti berildi", – deıdi memlekettik áleýmettik saqtandyrý qorynyń oblystyq fılıalynyń dırektory Nurlan Qystaýbaev.
