QR Tuńǵysh Prezıdenti – Elbasynyń Qory «Altyn tobylǵy» júldesiniń laýreattaryn marapattady.
«Altyn tobylǵy konkýrsymyz osymen ekinshi ret ótip jatyr. Bul maǵynaly, mazmuny tereń shara. Jastarǵa qamqorlyq jasap, jas ádebıetke jol ashýdyń jartylaı memlekettik, jartylaı qoǵamdyq sıpaty bar konkýrsqa aınalyp jatyr. Altyn tobylǵy degen attyń ózi qazaqy sıpat, ulttyq sıpatty berip jatyr. Onyń negizgi quryltaıshysy — alǵashqy Prezıdent qory. Al ıdeıanyń avtory — Jazýshylar odaǵy», — dep atap ótti óz sózinde Qazaqstan Jazýshylar odaǵynyń tóraǵasy Nurlan Orazalın.
Ádebıettiń jas ókilderin yntalandyrýdy maqsat sanaıtyn jobaǵa on segizden otyz beske deıingi daryndy qyz-jigitter qatysa alady. Qazylar alqasynyń aıtýyna qaraǵanda, bıyl usynylǵan shyǵarmalar qatary artqan. 110 úmitkerden altaýy úzdik shyqqan. Qanat Tileýhan men Oksana Almazovaǵa yntalandyrý syılyǵy tabys etildi. Byltyr poezııada júırik tabylmaǵan, esesine bıyl eki birdeı aqyn úzdik shyqty. Olar Erkeǵalı Beısenov pen Oljas Qasym. «Úzdik proza» nomınaııasy boıynsha Almas Núsip «Altyn tobylǵy» ıegeri atandy. Drammatýrgııada Álibek Baıbol júlde aldy. «Úzdik balalar shyǵarmasy» boıynsha Serikbol Hasannyń týyndysy ataldy. El Táýelsizdiginiń 25 jyldyǵyna arnalǵan «Táýelsizdik tuǵyry» taqyrybyna arnalǵan dúnıeler arasynda Tatıana Kretovanyń «Qaztaban» týyndysynyń shoqtyǵy bıik shyqty. Kretovaǵa bir jarym mıllıon, ózgelerine bir mıllıon teńge kóleminde sertıfıkattar tapsyryldy.
Erkeǵalı Beısenov, «Altyn tobylǵy» júldesiniń laýreaty:
- Bul meniń araǵa týra on jyl salyp marapattalýym. Alǵash ret 2006 jyly ótken halyqaralyq «Shabyt» festıvalinde jýrnalıstıkada júlde alǵam. Jalpy «Altyn tobylǵyny» júzden júırik myńnan tulpar shyqqandardy óziniń ádil baǵasyn berip marapattaıtyn biregeı baıqaý dep bilem. Sebebi munda túsken shyǵarmalar qazylar alqasynyń aldynda aty-jónderi kórsetilmeı túsedi.
24.kz
