Súıinshi, aǵaıyn! Kúni keshe ǵana uly Abaıdyń «Eskendir» poemasyn sahnalap, tusaýyn kesken «Qaradala halyq teatry» top jardy. Festıvalda gran-prıdi ıelendi. Anaý-mynaý festıval da emes, Germanııanyń Frankfýrt-na-Maıne qalasynda ótetin Halyqaralyq kópjanrly konkýrs-festıvalde dál sol bas júldeni qanjyǵalaryna baılady.
«Qaradala halyq teatrynyń» ashylýyna muryndyq bolyp, alǵashqy qoıylymnyń rejıssery bolǵan "Qazaqstannyń eńbek sińirgen qaıratkeri",Rejısser, teatr jáne kıno akteri Asqar Naımantaev bul festıval týraly óziniń áleýmettik jelidegi paraqshasynda Qaradala halqynan súıinshi surap, aqjoltaı habardy jetkizdi. Aıtpaqshy, bul baıqaýda bizdiń aýdandyq teatrdyń aldynda ǵana qaıta qurylǵan «Hantáńiri halyq teatry» da júldeli bolǵan. Tel qurdaıtaı ónerge qatar qadam basqan kórshi eki aýdannyń teatrlarynyń biri gran-prı, endi biri birinshi oryndy ıelengen. Elimizde emes halyqaralyq dárejedegi synda oza shapqan bizdiń óner ordalary kóptiń tańdaıyn qaqtyrǵan sekilddi. Ol týraly Asqar aǵamyzdyń óz sózinen mysal keltirelik.
«Germanııanyń Frankfýrt-na-Maıne qalasynda ótetin Halyqaralyq kópjanrly konkýrs-festıvalge qyzyqqan sebebim, kásibı ǵana emes áýesqoı, stýdenttik tipti balalar teatrlary da qatysa alady eken. Shartyn túgel oryndap, eki teatrdy ótkizdik. Qatysý jarnasy da tólendi. Ony Raıymbek jáne Uıǵyr aýdandyq mádenıet úıleriniń dırektorlary tapty. Jetpegenine qol ushyn bergen azamattar boldy.
Eki teatrdan basqa kásibı drama teatrlary, Qyrymnan mýzykaly teatr, Kıprden Dell Art teatry, birneshe plastıkalyq, eki ádebı teatr, bir hor teatry jáne teatr-stýdııalar, balalar teatry qatysty. Qazylar alqasy Germanııa, Reseı, (S-Peterbýrg, Máskeý, Volgograd), Belorýsııadan boldy. Germanııalyq qazylar mýzyka jáne teatr mamandary eken. Teatr nomınaııalaryn talqylaý GITIS (Rossıskıı ınstıtýt teatralnogo ıskýsstva) sheńberinde bastaldy. Bizdiń spektaklder Evropalyqtarǵa tyń taqyryp bolǵandyqtan suraq kóp boldy. Abaıdyń "Eskendir" poemasyn E. Vınokýrov degen aýdarǵan eken, gýgldatyp sony taýyp alyp jibergemin. Eskendir týraly birneshe ańyz biletinderge jańalyq boldy. Volgograd ınstıtýtynyń bir ustazy bul shyǵarma men spektakldi ǵylymı eńbek jazatyn taqyryby etip alatyn boldy. Al, Muqaǵalıdyń "Aqqýlar uıyqtaǵanda" shyǵarmasyn men óz sózimmen qysqasha mazmundap jazyp jibergen edim, ony neshe saqqa júgirte taldap, árkim ózinshe pálsapa quryp, tamsandy. Eki spektaklde de án az bolyp qaldy degendi de aıtyp qaldy biri. Aıtylǵan ánderdiń mazmunyn surap, áýen erekshelikterin sóz etti.
Básekege túsken spektaklder: A. Ostrovskııdiń "Talanttar men tabynýshylary", Antýan de Sent Ekzıýperıdiń "Kishkentaı hanzadasy", Gogoldiń "Óli jandary" jáne bir mıýzıkl boldy. Basqalary stýdentter, balalar teatry jáne teatr-stýdııalar.
Qazylar alqasy bir aýyzdan eki spektaklge qol kóteripti. Tańdaýdy ózime artqandaı suraq qoıdy : "Qaısysy alǵa shyqsyn?" - dep. Ózińmen óziń básekege túsken qıyn bolady eken. "Ekeýi birdeı" dedim uıalmaı. Tek Gran-prı jalǵyz bolady dep, sońynan jerebe arqyly Qaradala "Gran-prıge", Hantáńiri I-shi orynǵa, (I-shi dárejeli laýreat) ıe bolypty».
Mine, kúni keshe ǵana ashyla sala qulashyn keńge sermep, qanatyn keń jaıyp, aýyldyń ǵana emes eldiń atyn dúrkiretken qos teatrdyń jeńisi qutty bolsyn! Qaradalanyń ónerdegi qarlyǵashtary ózderiniń myqtylyqtaryn, talant ekendikterin dáleldeı aldy. Qýanysh qutty bolsyn, Qaradalam!
Qaradalalyqar
