Ámirıkada uzaq jyldar usaq qalalarda aq násildilerdiń arasynda turyp kelgen Igor Aızenbergtiń aıtýynsha halyq arasynda dıktatorlyq kúshterge degen suranys ta myqty kórinedi. Olardyń kóbi áli de bolsa shovınızm, rasızm aýrýymen aýyrady, afroámirıkalyq, nemese basqa tústegilerge degen kózqarastary áli de jaqsy emes. Tek jasy kelgen úlken adamdar ǵana emes, orta jastaǵylar arasynda da mundaılar jetkilikti eken. Sondyqtan da Tramp ketkenmen de dıktatorlyqqa degen suranys azaıa qoımaıtyn sııaqty, onyń ornyna taǵy bir sondaı bireý keletini anyq.
Degenmen de ámirıka qoǵamy úzdiksiz damý ústinde. Demokrat Baıdenniń bul jeńisi sol demokratııalyq úrdisti odan ári damytatyn sııaqty, oǵan dálel - qazirgi kezde kóptegen basqa násildegi adamdar iri qyzmetterge taǵaıyndalyp jatyr. Kamala Harrısten basqa, Pentagonnyń basshysyna (Qorǵanys mınıstri) qara násildi general Ostın usynylyp otyr. Bul áskerı qyzmettegi osyndaı dárejege jetkeli otyrǵan alǵashqy afroámirıkalyq (eger Senat bekitse).
Al basqa, quramynda afroámirıkalyq nemese basqa tústegi halyqtary joq dıktatorlar ne istep jatyr? Aıtalyq Reseıde jershildik keń syıpat alǵan. Eger baspasóz málimetterine sensek, Pýtınniń aınalasyna túgelge jýyq burynǵy peterborlyqtar jınaqtalǵan. Sondaı-aq onyń bala kezgi dostary, birge bıznes jasaǵan sybaılastary jeterlik eken. Mundaı ádet tek Pýtınniń basynda ǵana emes, odan burynǵy Elın, Gorbachevterde de kezdesedi. Áıteýir ózderin mem. qyzmette jaqsy jaqtarynan kórsete bilgen, alǵyr, adal, isine tııanaqty adamdar emes, tek tanystyǵy úshin ǵana bıik qyzmetterge taǵaıyndalǵandar jeterlik. Al Baıdenniń taǵaıyndap jatqan adamdary arasynda onymen árqashanda kelise bermeıtin, tıisti jerinde aldymen eliniń múddesin qorǵaı alatyn adamdar jetkilikti eken. Mine, demokratııa degenimiz osy.
Al bizdegi jaǵdaı she? Qazirgi kadr saıasatyna qarap otyryp bizdegi jaǵdaı tek jáı ǵana dıktatorlyq emes, naǵyz qubyjyq, orta ǵasyrlyq dep aıtýǵa bolady. Munda tek bir rýdyń, júzdiń ǵana emes, tipti joǵarǵy eshelonda orys tilimen aýyzdanǵandar ǵana ómir súre alatyndaı jaǵdaı qalyptasqan desek onsha qatelespespiz. Óıtkeni óz tilimen sýsyndamaǵan, ulttyq múddeniń ne ekendiginen beıhabar adamdar joǵarǵy basshylyqty tolyq jaýlap alǵan. Sebebi - arǵy jaǵy dym kórmegen, qazaqsha aıtqanda "qoıdan shyqqan qodyrańdar".
Foto ashyq derekkózden alyndy.
