QR Premer-ministrınıŋ orynbasary – mädeniet jäne aqparat ministrı Aida Balaeva men Turizm jäne sport ministrı Erbol Myrzabosynov Almaty oblysyndaǧy turistık nysandardyŋ jazǧy mausymǧa daiyndyǧyn tekserdı.
Jūmys saparyna ortalyq memlekettık organdardyŋ, Ükımet apparatynyŋ ökılderı, sondai-aq Almaty oblysynyŋ äkımı Marat Sūltanǧaziev qatysty.
Tekseru barysynda Qonaev qalasyndaǧy kommunaldyq jaǧajailar men «ASP Arena» köpfunksionaldy keşenı qaraldy. Oblys äkımdıgı men beiındı qyzmetter sanitariialyq daiyndyq, qauıpsızdık şaralary, medisinalyq, qūtqaru jäne qūqyq qorǧau qyzmetterınıŋ jūmysy, sondai-aq demaluşylarǧa qolaily jaǧdai jasau jönınde baiandady.
Aida Balaeva nysandardyŋ tolyq daiyndyǧyn däl qazırden bastap qamtamasyz etu qajettıgıne erekşe nazar audardy. Sonymen qatar halyqpen uaqytyly tüsındıru jūmystaryn jürgızudıŋ, sudaǧy qauıpsızdıktı, azyq-tülık qauıpsızdıgın qamtamasyz etudıŋ jäne qoǧamdyq tärtıptı saqtaudyŋ maŋyzdylyǧyn atap öttı.
Sonymen bırge barlyq jaǧajailar men demalys aimaqtary äkımdıkterdıŋ qarauynda emes ekenı de arnaiy aityldy. Osyǧan bailanysty Aida Balaeva jekemenşık nysandardyŋ ielerı de tazalyqqa, qoǧamdyq tärtıpke, infraqūrylymnyŋ jai-küiıne jäne eŋ aldymen adamdardyŋ sudaǧy qauıpsızdıgıne tolyq jauapkerşılıkpen qarauǧa tiıs ekenın aitty. Oblys äkımdıgıne demalys aimaqtary ielerınıŋ atyna qauıpsızdıktı qamtamasyz etu, sanitariialyq talaptardy saqtau jäne jazǧy mausym kezeŋınde jūmysty tiıstı deŋgeide ūiymdastyru jönındegı ūsynymdar qamtylǧan tiıstı habarlamalar äzırleu tapsyryldy.
Būdan bölek, turizm jäne sport ministrıne turistık nysandar ielerı men jeke kompaniialardyŋ qajettı infraqūrylymdy qamtamasyz etuıne, qauıpsızdık talaptaryn saqtauyna jäne belgılengen normalardy oryndauyna qatysty jauapkerşılıgın retteitın qūqyqtyq tetıkterdı pysyqtau tapsyryldy. Jekemenşık demalys aimaqtary azamattar men memleket aldyndaǧy tiıstı jauapkerşılıksız tek kommersiialyq qyzmetpen ǧana şektelmeuge tiıs ekenı basa aityldy.
Premer-ministrdıŋ orynbasary turistık aimaqtarda jūmys ısteitın qoǧamdyq tamaqtanu oryndary men özge de servistık nysandar qyzmetınıŋ zaŋdylyǧyn baqylau qajettıgıne de airyqşa nazar audardy. Uäkılettı organdarǧa eŋbek zaŋnamasynyŋ saqtaluyn, qyzmetkerlermen, onyŋ ışınde jūmysqa tartylatyn jastarmen jäne studenttermen jasalǧan eŋbek şarttarynyŋ boluyn, sondai-aq eŋbek qauıpsızdıgı talaptarynyŋ oryndaluyn tekserudı qamtamasyz etu tapsyryldy. Azamattardyŋ qūqyqtary tolyq kölemde saqtaluǧa tiıs ekenı atap ötıldı. Būl demaluşylardyŋ da, jergılıktı tūrǧyndar men qyzmetkerlerdıŋ de qūqyqtaryna bırdei qatysty.
Sonymen qatar kölık logistikasy, avtotūraqtardyŋ jetkılıktılıgı, jol qozǧalysyn ūiymdastyru jäne jappai demalys oryndaryndaǧy kölık aǧynyn retteu mäselesı de köterıldı. Qoǧamdyq tärtıp pen qauıpsızdık talaptaryn būzuǧa qataŋ äreket etu qajettıgı bölek körsetıldı. Aida Balaeva barlyq belgılengen talaptar mültıksız saqtaluǧa tiıs ekenın, al qūqyq būzuşylarǧa qatysty şaralar uaqtyly ärı zaŋnamaǧa säikes qabyldanuy qajet ekenın atap öttı.
«“Taza Qazaqstan” ideologiiasy jai ūran bolyp qalmai, turistık nysandardyŋ jai-küiınen körınıs tabuy kerek. Ol tazalyqtan, tärtıpten, keŋıstıktıŋ tüsınıktı ūiymdastyryluynan jäne ortaq demalys ornyna degen qūrmetten baiqaluǧa tiıs. Al “Zaŋ men tärtıp” qaǧidaty barlyq qyzmettıŋ naqty ärı üilesımdı jūmysynan jäne qauıpsızdık talaptary men qoǧamdyq tärtıp normalaryn būzǧandarǧa qatysty şaralardyŋ būltartpai qoldanyluynan körınuı qajet», — dedı Aida Balaeva.
Jūmys saparynyŋ qorytyndysy boiynşa Premer-ministrdıŋ orynbasary aumaqtardyŋ sanitariialyq jaǧdaiyn küşeitudı, infraqūrylym men qauıpsızdık qyzmetterınıŋ daiyndyǧyn qamtamasyz etudı, halyqpen profilaktikalyq tüsındıru jūmystaryn jandandyrudy, sondai-aq kommunaldyq jäne jekemenşık demalys nysandaryna jüielı baqylau ornatudy tapsyrdy. Sonymen bırge zaŋdylyqtyŋ saqtaluyna, azamattardyŋ eŋbek qūqyqtaryn qorǧaluyna jäne menşık ielerınıŋ qauıpsızdık, tärtıp pen körsetıletın qyzmet sapasy üşın jauapkerşılıgıne erekşe män berıldı.
