Qazaqtyń aqyn qyzy, qoly shıpaly dáriger Maǵıza Qunapııaqyzy Halyqaralyq “Alash” ádebı syılyǵynyń ıegeri atandy. Maǵıza hanymǵa «Adyrna» aqparattyq agenttigi shyǵarmashylyq tabystar tileıdi. Endeshe aqynnyń óleńderin nazarlaryńyzǵa usynamyz.
BAL QADIShA
"Degende Balqadısha,Balqadısha,
Esildi boılaı bitken tal,Qadısha".
"Erkem"dep eki jeńgeń ertip júrer,
Qadiriń Han qyzyndaı bar,Qadısha.
Aq súırik saýsaqtaryń úlbiregen,
Maıysqan ár qımylyń bir- bir óleń.
Kórgen jan kelbetińnen kózin almaı,
Bozbala deı almaıtyn "dilgir emen".
Qadısha!
Dıdary- jaz,kózi-kóktem.
Túsken bir peri dersiń ózi kókten.
Úziltip tańǵa deıin án salǵanda,
Aqannyń qoly jetpeı,sózi jetken.
Teń ediń kóp ishinen, sanaýlyǵa.
Qoıdy ma qyryq jigit qaraýylǵa?
Ýaqytty shegerýge múmkin bolsa,
Barar em sol dáýirge ,sol aýylǵa!
"Qyzy ediń Ybekeńniń Balqadısha"...
Muńymyz saǵan aıtar bar,Qadısha:
Qulatpaı, qoltyqtaıtyn qos jeńge joq,
Biz júrgen joldyń sheti jar, Qadısha!
Keıbireý ózi qular jar degenge.
Qadısha qalar ma ediń,"qal"degende?
Seri Aqan aınalǵandaı muzart shyńǵa,
"Ruqsat bizden sizge,bar"degende!
"Aýylyń qondy eken" dep "qaıdan jyraq?"
Qaıtty eken,qansha jigit toıdan jylap?
Turǵylas kúıeýińdi "shal edi"dep,
Pysyqtar sóz qystyrǵan oıdan qurap.
Ózine uqsatypty dala-seri,
Tógilgen án men jyr bol nala,sheri.
Dalanyń,Aqan degen-tól perzenti,
Qazaqtyń onan keıin, balasy edi.
Shapqanda jelden ozar Qulageri,
Búrkiti bult ústinde qumar edi.
Ǵalamnyń myń notasyn án ǵyp órgen,
Baıyrǵy bekzat kúnniń murageri.
Ánmenen qandaı ǵajap syrdy aqtarǵan,
Júregiń áýenine qundaqtalǵan.
Júıkemiz júnjip bitti bul kúnderi,
Oısyz sóz, osqyrynǵan yrǵaqtardan....
Qadısha!
Urpaqtaryń júr me elińde?
Belgiń qap,daýysy men júzderinde?
Er salar arǵymaqqa kún bolar ma,
Baýyryn Jylandynyń bir kórýge?!!
ǴANIBET
Qara túnge qadalǵanym- ǵanıbet.
Aına aldynda taranǵanym-ǵanıbet.
Birde oıǵa,birde muńǵa batyryp,
Súıý úshin jaralǵanym- ǵanıbet.
Qas-qaǵym sát,baqyt qushqan- máńgi shaq.
Ózgermeıtin,ótpeıtuǵyn mándi shaq.
Kóz aldymnan ketpeı qoıǵan kólbeńdep,
Qulaǵymda tunyp qalǵan án qusap.
Zorǵa jyly til qatqanym- ǵanıbet.
Tátti uıqyńdy urlatqanyń- ǵanıbet.
Ókinbeshi,seni oılap júrgende,
Aı,jyldarym qoldy bolǵan zar ılep!
Qanat bitip,sharq urǵanym- ǵanıbet,
Tózim bitip,sarqylǵanym- ǵanıbet.
Jasyrýǵa álim jetpeı sezimdi,
Jalynyńa sharpylǵanym- ǵanıbet.
Biz baqyttan qalǵıyqshy qalǵysaq.
Ǵashyqtardyń qudaıynan alǵys ap.
Qýanyshtan esi shyqqan jel qusap,
Bir-aq túnde búrleı salǵan tal qusap!
Synaı, synaı,synaqtarym sıregen.
Elesiń kep bar erkimdi bılegen.
Jan men tándi orap alǵan ot sezim,
Tún reńdi burym qaldy kúımegen!
QIIa ALMAI....
Qııa almaı zorǵa qalasyń daǵy,
Alasyń kózden muń urlap.
Eki kezdesý arasyndaǵy,
Úzilis nege tym uzaq?
Eki kezdesý arasyndaǵy,
Bolmaıdy bostyq tym tynysh.
Qyzǵanysh,kúdik,ókpe,renish,
Saǵynysh,alań,kúrsinis.
Jańbyrdyń jyry,ormannyń bıi,
Borannyń kúıi- uqqanym.
Qalypqa oıym syımaǵanmenen,
Qalyptan biraq shyqpadym.
Taldyrdy muńym,talshyq etip em,
Ótken kúnderdiń elesin.
Basqalar netken baqytty edi,
Ózińdi kúnde kóretin.
Suq saýsaqtarym múıizgek boldy,,
Esigin qaǵyp baqyttyń.
Jolyqpaı múmkin ketermiz bizder,
Qanjyǵasynda ýaqyttyń...
JASYRAMYN SÓZIMDI
Bolsam ba eken janyńnyń qurbandyǵy,
Kórkin ashyp baǵyńnyń turǵan gúli.
Saǵan aıtqan sózderim jazǵan jyrym,
Aıtylmaǵan sózimniń myńnan biri.
Umytam dep ózimdi áýre etippin,
Kórgenime aman-saý,táýbe etippin.
Myna ómirge meni izdep kelgenińmen,
Adastyń-aý, qaıteıin, sál keshiktiń...
Janym qyldaı bolady «ketem» deseń,
Keteriń bar kezdestiń bekerge sen.
Senedi ekem sen túndi «kúndiz»deseń,
Nanady ekem ómirdi «sheker» deseń!
Osy eken ǵoı bir bolar toı degeniń!
(Óńim birdeı túsimmen keıde meniń).
Ne aıtqanyń mańyzdy emes, biraq,
Maǵan qarap keregi sóılegeniń.
Qajeti joq, eshkimdi shaqyrmaǵyn,
Tyńdamaımyn, bireýdiń aqyldaryn...
Myna álemniń eleýsiz núktesinde,
Keregi tek janymda otyrǵanyń.
Jaralǵansyń sezimmen terbetýge,
Qozǵamashy!
Qulqym joq erjetýge...
Jasyramyn sózimdi estir bolsań,
Bir ózgeris bolardaı jer betinde!
SEN KELESIŃ
Sansyraısyń, qur bosqa sendelesiń,
Ótken kúnniń qýmaımyn endi elesin.
Aqboz attyń jalynan jel estirip,
Shyǵys jaqtan, bir kúni sen kelesiń!
Sen kelesiń túbińde, joq talasym,
Qaryp túser talaıdy, ot qarasyń.
Qubylany betke alyp shyqqanmenen,
Bizdiń tusqa kelgende.
Toqtalasyń!
At bas shulǵyp,al ıtter yryldasyp...
«Qut keldi» dep jurt kóshpen, yrymdasyp.
Aıran alyp shyǵamyn, sol kún aldan,
Qoldarymdy azyraq diril basyp...
Tasqa bitken, qyna men arsha deımin,
Arshany aıtyp, bireý án salsa deımin.
At ústinen aırandy taýsaı salmaı,
Tússe deımin, qasymda qalsa deımin...
Tamshy ilinip, kóz deıtin shar aınaǵa,
«Qosh!»deımin be, bolmasa, sál oılana...
Jetem degen aýylyń, jyraq bolsa,
Jolyń bolsyn!
Artyńa qaraılama!
