Qazaqstan Parlamenti zeınetaqy jınaqtarynyń bir bóligin qajettilikterge maqsatty paıdalanýdy kózdeıtin «Qazaqstan Respýblıkasynyń keıbir zańnamalyq aktilerine ekonomıkalyq ósýdi qalpyna keltirý máseleleri boıynsha ózgerister men tolyqtyrýlar engizý týraly» zańdy qabyldady. Bul týraly «Adyrna» ulttyq portaly Qazaqstan Respýblıkasy Eńbek jáne halyqty áleýmettik qorǵaý mınıstrliginiń resmı saıtyna silteme jasaı otyryp habarlaıdy.
Zańǵa sáıkes 2021 jyldan bastap qazaqstandyqtarǵa zeınetaqy jınaqtarynyń bir bóligin turǵyn úı jaǵdaılaryn jaqsartýǵa, qymbat turatyn emdelýge aqy tóleýge nemese jeke basqarýshy kompanııalarǵa basqarýǵa berýge paıdalaný quqyǵy beriletin bolady.
Zeınetaqy jınaqtarynyń bir bóligin naqty qajettilikterge paıdalaný quqyǵyn kelesi azamattar paıdalana alady:
- jumys isteıtin, tıisti jasta zeınetaqy jınaqtary «jetkiliktilik sheginen» asatyn azamattar;
- saqtandyrý kompanııalarymen BJZQ-da qalǵan zeınetaqy jınaqtarynyń somasy sheginde ómir boıy annýıtettik tólemderdi qamtamasyz etetin zeınetaqy annýıteti sharttaryn jasasqan adamdar;
- zeınetkerlikke shyqqan azamattar (onyń ishinde áleýetti qurylymdar qatarynan) - BJZQ-da qalǵan zeınetaqy qarajatynyń 50%-ynan aspaıtyn shekte. Eger olardyń zeınetaqysynyń jıyntyq mólsheri (jasyna baılanysty nemese eńbek sińirgen jyldary úshin zeınetaqyny, bazalyq zeınetaqyny qosa alǵanda) joǵalǵan tabysty halyqaralyq standarttarǵa sáıkes keletin deńgeıde (keminde 40%-ǵa) almastyrýdy qamtamasyz etken jaǵdaıda.
Belgili bir jastaǵy salymshy úshin onyń tabysynan BJZQ-ǵa aldaǵy 10% turaqty zeınetaqy jarnalaryn (eń tómengi jalaqydan az emes) eskere otyryp, eń tómengi zeınetaqy mólsherinen az bolmaıtyn zeınetaqy tólemderimen qamtamasyz etýge múmkindik beretin zeınetaqy jınaqtarynyń eń tómengi qajetti somasy «jetkiliktilik shegi» retinde qarastyrylady.
«Jetkiliktilik shegi» áıelder men erler úshin birdeı belgilenedi jáne árbir jas úshin esepteledi. Bul rette ol qalyptasqan parametrlerge (kiristilik, ınflıaııa, eń tómengi tólem mólsheri jáne t. b.) súıene otyryp, jańa alýshylar úshin qaıta esepteletin bolady.
Zańda sondaı-aq joǵaryda atalǵan sanattaǵy azamattar zeınetaqy jınaqtarynyń bir bóligin ózderi, jubaılary nemese jaqyn týystary (atalary/ájeleri, ata-analary, balalary, nemereleri, aǵa-inileri/apa-sińlileri) úshin turǵyn úı jaǵdaılaryn jaqsartý maqsatynda nemese emdelýge aqy tóleýge paıdalana alady dep kózdelgen. Maqsatty paıdalaný úshin kórsetilgen otbasy músheleriniń qarajatyn biriktirýge bolady.
Belgilengen talaptarǵa sáıkes kelgen jaǵdaıda alyp qoıýlardyń sany boıynsha shekteýler kózdelmegen, ıaǵnı azamattardyń zeınetaqy jınaqtarynyń bir bóligin sol bir ne basqa maqsatqa qaıta paıdalanýyna jol beriledi.
Zeınetaqy jınaqtaryn tóleý esebinen turǵyn úı jaǵdaılaryn jaqsartý tártibin QR Indýstrııa jáne ınfraqurylymdyq damý mınıstrligi bekitedi.
Azamattardy emdelýge jiberý qaǵıdalaryn QR Densaýlyq saqtaý mınıstrligi aıqyndaıdy.
Zeınetaqy aktıvterin senimgerlik basqarýǵa berý qaǵıdalaryn QR Qarjy naryǵyn retteý jáne damytý agenttigi aıqyndaıdy.
Zań Memleket basshysyna qol qoıýǵa jiberildi.
"Adyrna" ulttyq portaly
