Donald Tramp ákimshiligi AQSh-tyń Reseıdegi eki Bas konsýldyqtarynyń jabylýy týraly jarııalady. Sankt-Peterbýrgte konsýldyq 2018 jyly jabylǵandyqtan, Vladıvostok pen Ekaterınbýrgte sońǵy eki bólimsheleri ǵana qalǵan.
Associated Press aıtýy boıynsha, ótken aptada AQSh Memlekettik departamenti Vladıvostoktaǵy konsýldyqty birjolata jaýyp, Ekaterınbýrgtegi konsýldyqtyń jumysyn ýaqytsha toqtatatyndyǵy jaıly habardar etti.
Agenttiktiń habarlaýynsha, eki konsýldyqtyń jabylýy jaıly aqparat AQSh Kongressine 10 jeltoqsanda jiberilgen. Iaǵnı bul AQSh tarıhyndaǵy eń úlken kıbershabýyl - Sunburst bolmaı turyp, úsh kún buryn sheshilgen.
«Dıplomattyq vızalarǵa baılanysty qıyndyqtar»
2017 jyly Reseı bıligi, jumys isteýge ruqsat berilgen AQSh dıplomattarynyń sanyn azaıtýǵa sheshim qabyldady. Bul AQSh konsýldyqtarynyń jabylýynyń basty sebebi. Reseıdiń 2017 jyly engizgen shtattyq shekteýleri dıplomatııalyq vızalarmen baılanysty qıyndyqtardyń paıda bolýyna ákeldi.
TASS AQSh Memlekettik departamentiniń ókiline silteme jasaı otyryp, Memlekettik hatshy Maıkl Pompeo osyndaı sheshimge keldi dep habarlaıdy.
Memlekettik hatshy Reseıdegi AQSh elshisi Djon Sallıvanmen aqyldasa otyryp, dıplomatııalyq mıssııanyń qaýipsiz jáne senimdi jumysyn qamtamasyz etý aıasynda Vladıvostoktaǵy AQSh Bas konsýldyǵyn jabý jáne Ekaterınbýrgtegi AQSh Bas konsýldyǵynyń jumysyn ýaqytsha toqtatý týraly sheshim qabyldady.
TASS-tyń suhbatshysy jumysty ońtaılandyrý úshin konsýldyqtardy jabý maqsatyn atady: «AQSh-tyń Máskeýdegi elshiliginde dıplomatııalyq personaldy qaıta qurý bizge Reseıdegi syrtqy saıası múddelerimizdi barynsha tıimdi jáne qaýipsiz túrde damytýǵa múmkindik beredi».
«Bul Reseıdiń AQSh-taǵy bas konsýldyqtaryna esh áser etpeıdi», - dedi ol.
Pandemııa áseri
Konsýldyqtar jabylǵannan keıin AQSh-tyń Reseıdegi jalǵyz dıplomatııalyq ortalyǵy Máskeýdegi elshilik bolady.
2018 jyly Ulybrıtanııada Skrıpaldardyń ýlanýynan keıin Sıetldegi Reseı konsýldyǵy óz jumysyn toqtatty. Nátıjesinde, Reseı AQSh-tyń Sankt-Peterbýrgtegi Bas konsýldyqtyń jabylýyn talap etti.
Naýryz aıynda pandemııaǵa baılanysty Vladıvostoktaǵy konsýldyq óz qyzmetterin is júzinde toqtatty. Al qyzmetkerleri jabdyqtar men qujattaryn shyǵara bastaǵan. Vladıvostok pen Ekaterınbýrgtegi konsýldyqtarda 10 amerıkandyq dıplomat jáne 33 reseılik qyzmetker jumys istegen.
Konsýldyqtardyń qashan jabylatyny naqty anyqtalǵan joq. Amerıkandyq qyzmetkerler Máskeýdegi elshilikke aýystyrylyp, jergilikti turǵyndar jumystan shyǵarylady. AQSh Memlekettik departamentiniń málimetinshe, Vladıvostoktaǵy konsýldyqtyń jabylýy jylyna 3,2 mıllıon dollar únemdeýge múmkindik beredi.
Saldarynda, Reseıdiń keń aýmaǵy AQSh-tyń dıplomatııalyq ókildiktersiz qalady. Konsýldyqtyń azaıýy amerıkandyq saıahatshylarǵa ǵana qolaısyz emes, reseılikter de tek Máskeýde ǵana vıza alýǵa májbúr bolady.
Naýryz aıynan bastap Ekaterınbýrgtegi konsýldyq tek tótenshe jaǵdaılarda qyzmet kórsetedi dep sheshilgen bolatyn. Al Vladıvostoktaǵy konsýldyqtyń qyzmeti pandemııaǵa baılanysty tolyǵymen toqtatyldy. Buǵan Reseı azamattary men amerıkandyq qyzmetkerlerdiń densaýlyǵyna alańdaý sebep boldy. Sonymen birge, Memlekettik departament konsýldyq Vladıvostoktaǵy jumysyn «jaǵdaı jaqsarǵan soń» qaıta bastaıdy dep úmittengen.
Jaqynda BBC-ge Ekaterınbýrgtegi konsýldyq qandaı jumystar atqaratynyn túsindirip ótti: «Biz ımmıgraııalyq emes vızalardy saıahaty gýmanıtarlyq maqsattarmen baılanysty, tótenshe jaǵdaıdaǵy ótinish berýshilerge ǵana bere alamyz, mysaly, AQSh-taǵy jaqyn týystaryn jerleý nemese shuǵyl emdelýmen baılanysty bolǵan kezde. Stýdentterge oqýyn jalǵastyrý úshin, sondaı-aq ushý jáne keme ekıpajdarynyń múshelerine de vıza beremiz.»
AQSh-tyń Reseıdegi burynǵy elshisi Ekaterınbýrg pen Vladıvostoktaǵy konsýldyqtardyń jabylýyna ókinish bildirdi. «Bul qate. AQSh Reseı qoǵamymen tikeleı qarym-qatynas ornatýǵa umtylýy kerek, al konsýldyqtar ony júzege asyrýǵa kómektesedi. Men saılanǵan prezıdent Djo Baıden bul sheshimdi ózgertedi dep úmittenemin», - dep óziniń Twitter-de eki qaladan túsken sýretterimen birge jarııalady.
Dıplomatııalyq qaqtyǵys
2016 jyldyń jeltoqsanynda Máskeý men Vashıngton arasynda dıplomatııalyq qaqtyǵys bastaldy. Qyzmetten ketip bara jatqan prezıdent Barak Obama 35 reseılik dıplomatty jáne olardyń otbasylaryn AQSh-tan Otanyna qaıtarýǵa sheshim qabyldady.
2017 jyldyń shildesinde Reseı AQSh-tan Amerıkadaǵy Reseıdiń dıplomatııalyq mıssııa qyzmetkerleriniń sanyn 755 adamnan - 455 adamǵa deıin qysqartýdy talap etti. Osydan keıin Vashıngton San-Franıskodaǵy Reseı konsýldyǵyn jabýyn ótindi. Al 2018 jyldyń naýryz aıynda Reseıdiń dıplomatııalyq mıssııasynyń taǵy 60 qyzmetkeri qaıtaryldy. Oǵan qosa, Skrıpalmen ýlanýyna baılanysty Sıetldegi konsýldyq jabyldy.
Kremldiń baspasóz hatshysy Dmıtrıı Peskov aıtýy boıynsha, Ekaterınbýrg pen Vladıvostoktaǵy AQSh-tyń bas konsýldyqtarynyń jabylýy eki el arasyndaǵy qatynastaryna eshqandaı áser etpeıdi.
«Konsýldyqtardyń negizgi maqsaty konsýldyq jáne vızalyq qyzmetterdi usyný. Bul qyzmetter bizdiń jerimizdegi Amerıkandyq ókildikterinde kópten beri júzege asyrylmaǵan. Sondyqtan bul eshteńege áser etpeıdi. Eger siz jalpy qarym-qatynastar týraly aıtatyn bolsańyz, onda bul sheshim oǵan da yqpal etpeıdi» - deıdi Dmıtrıı Peskov.
Derekkózder:
- 2020/SShA zakroıýt poslednıe dva konsýlstva v Rossıı
https://www.bbc.com/russian/news-55374254
