QR Qorǵanys mınıstrligi Kadr departamentiniń burynǵy basshysy, general-maıor Qaırat Kópbaev para alǵany úshin sottaldy, dep habarlaıdy «Adyrna» tilshisi Sybaılas jemqorlyqqa qarsy is-qımyl agenttiginiń Telegram akkaýntyna silteme jasap.
Qazirgi tańda general-maıorǵa qatysty qylmystyq isti tergeý aıaqtaldy.
«2019 jyldyń mamyr aıynda Kópbaevtyń Aqtóbe qalasyndaǵy «T.Bıgeldınov atyndaǵy Áýe qorǵanysy kúshteriniń Áskerı ınstıtýty» RMM-ǵa ofıerlik laýazymǵa taǵaıyndaǵany úshin 200 myń teńge somasynda para alǵany anyqtaldy. Aqmola garnızony Áskerı sotynyń úkimimen Kópbaev memlekettik qyzmette ómir boıyna laýazym atqarý quqyǵynan jáne 5 jylǵa bas bostandyǵynan aıyryldy», - delingen habarlamada.
Sonymen birge, sot Qazaqstan Respýblıkasy Prezıdentiniń atynan Kópbaevty general-maıor áskerı ataǵynan jáne «Qurmet» ordeninen aıyrý týraly usynys engizgen.
«Adyrna» ulttyq portaly
