Aqyry kesheden beri jer týraly másele shyǵyp jatyr eken. Óz oıymdy, azamattyq pikirimdi bildirsem.
Jer betinde qanshama ult, ultaraqtaı jerge ıe bolyp, táýelsiz el bolýdy armandaýda. Biz de aldymen Allaǵa shúkir, ekinshi ata-babalarymyzǵa myń rahmet, Altaı men Arqa arasyn sozyp jatqan, ulan- ǵaıyr jerimiz bar. Nelikten bul másele osymen qansha márte, kórshiles elde kóteriledi? Onyń myń san sebebi bolýy múmkin. Men kórip turǵan bir sebebi, jerimiz bos jatyr. Halyq sany az shoǵyrlanǵan, ıgerilmeı jatyr. Poıyzben eki oblys arasyna jol júrip kórseńiz, ózińiz de rastaısyz.
Qıt etse, shet eldik tájirıbe deımiz ǵoı. Jeriniń tek 20% - y ǵana aýyl sharýashylyǵy ónimderin ósirýge múmkindigi bar Izraıl, óz ishinde naryqtyń 90%- yn azyq- túlikpen, aýyl sharýashylyq ónimderimen qamtamasyz etip otyr. Jáne alys- jaqyn shet elge de eksporttaýda. Eýro odaqty qosqanda.
Biz az ǵana halqy bar memleketpiz. Tek bir ǵana aýyl sharýashylyǵyn damytyp, bos jatqan jerdi ıgerip ǵana 18 mln halyqty asyraýǵa bolady, dep oılaımyn. Jáne bizdiń ónimder shynynda da dámdi jáne sapaly emes pe? Ony alys- jaqyn shet elge baryp, ózge eldiń eti men nanyn jep kelgender rastaı alady. Tek 18 mln halyqty asyrap ǵana emes, álemde aýylsharýashylyq salasynyń derjavasy bolýǵa ábden qaýqarymyz bar.
Ata- babalarymyzdyń qanymen alyp bergen jeriniń, qazba baılyǵy taýsylar. "Túlkiniń qyzyly ózine sor". Endi bizge jer asty baılyǵyn emes, ústiniń baılyǵyn óz nesibemizge jaratar kún keldi.
Ekinshi másele."Baıdyń asyn, baıǵus qyzǵanady",- bolmaı. Jas jáne kóp balaly otbasylarǵa barynsha qamqorlyq kórsetilýi tıis. "Balany qalaı asyraımyn",- dep, qoryqpaı, erteńine senimdi bolǵanda ǵana halyq sany kóbeıedi. Sonda ǵana biz osy jerge ıe bola alamyz. Ásirese aýyldaǵy aǵaıynnyń jaǵdaıy jasalsa, altyn qursaqty analarymyz 7-8 qaradomalaqty kóbeıter edi.
Úshinshi másele, halyqty jappaı salmaqty, zamanaýı bilimge jeteleý. Arzan oıyn- kúlkiniń zamany ótti. Jan- jaǵymyzǵa qarap balalarymyzdy zamanǵa saı bilim berýge umtyldyrý. Ol úshin árıne biz ata- analar ózimiz sanaly, saýatty bolýymyz kerek. Instadaǵy juldyzdardyń, arzan kúlkili dúnıege emes, salmaqty, salıhaly dúnıeni ulaǵattaıtyn ýaqyt keldi.
Foto ashyq derekkózden alyndy.
