Múmkindikke toly QazUÝ qalashyǵy

3490
Adyrna.kz Telegram

«Stýdenttik ómir – ómirińniń eń jarqyn sátteri» dep aıtýshy edi úlkender. Búgingi kúnim sol sózderdiń dálelindeı. UBT óte salysymen Almaty qalasyna, armandaǵan oqý ornyma kelýge qatty asyqtym. Oqý ornyn armandaǵanda oıyma tek Ál-Farabı atyndaǵy Qazaq Ulttyq ýnıversıteti keletin. Osy oqý ordasyna alǵash kelgendegi sezimim erekshe boldy. Bıik taýlarǵa tamsana qaradym. Ál-Farabı eskertkishine uzaq qarap turdym da, ishimnen erekshe jylýǵa toly «Ál-Farabı ata» degen sózdi aıttym. Kún saıyn sabaqqa kelip-ketip júrgende bıik rektoratqa qaraımyn da, qasıetti qara shańyraqtyń stýdenti bolǵanyma shúkirshilik aıtamyn. Men úshin erekshe ári mańyzdy kún «Stýdentterdi qabyldaý keshi» boldy. Bul kesh óte joǵary deńgeıde ótti. Ál-Farabı atyndaǵy Qazaq Ulttyq ýnıversıtetinde stýdentterge múmkindik kóp. Túrli baǵyttaǵy uıymdar bar. Uıymdarǵa kirip, qoǵamdyq jumystarǵa aralasýǵa zor múmkindik bar.QazUÝ-da kún saıyn jańa dostarmen tanystym. Osylaısha, ortam keńeıdi. «Suńqar stýdentter men magıstranttar kásipodaǵynyń» múshesi boldym. Suńqardyń jetken jetistikterin qarap, qoǵamǵa paıdaly kásipodaq ekenine kóz jetkizip Suńqardy tańdadym. «Suńqar» kásipodaǵynyń joǵarǵy kýrs stýdentteri bizdi «balmuzdaqtarym» dep erekshe meıirimmen qarsy alǵan edi. Suńqardyń ár jınalysy qyzyqty ótedi. Osy kásipodaqty tańdaǵanyma qýanamyn. Meniń ortamdy, dostarymdy keńeıtti. Ár jınalysta ótkiziletin is-sharalar týraly aqyldasyp, pikir almasyp turatynbyz. Qazir onlaın jınalystar bolady. Keremettegi Suńqarǵa arnalǵan bólmege kezekshilikke baryp turatynbyz. Keremette QazUÝ stýdentterine múmkindik kóp. Jumyspen qamtý ortalyǵy, kınoteatr, kishigirim aýrýhana da bar. Budan bólek stýdenke qajettiniń bári tabylady. QazUÝ-da ınternet ortalyǵy, Ó.A. Joldasbekov atyndaǵy stýdentter saraıy, murajaı, kompıýterli- tehnıkalyq jabdyqtar, WI-FI symsyz ınternet jelisi, aýqymy keń sporttyq keshen syndy ortalyqtar ornalasqan. Ál-Farabı atyndaǵy kitaphanada kitaptyń barlyq túri bar. Stýdentterge esh qıyndyqsyz kitap alýǵa múmkindik jasalǵan. Bunyń barlyǵy stýdenttiń esh qıyndyqsyz bilim alýyna jasalǵan joǵary múmkindik. Oqý ornynda esimnen ketpeıtin erekshe kún Fılologııa jáne álem tilderi fakýltetiniń stýdentterimen taýǵa shyqqanymyz. Joǵary kýrs stýdentteri bizge barynsha qamqorlyq tanytyp, jaqyn tanysý maqsatynda bizdi taýǵa alyp bardy. Taýdaǵy «Býtakovka» sarqyramasyna bardyq. Qyzyqty oıyndar oınadyq. Gıtaramen án aıtyldy. Bizdiń KazUÝ qalashyǵynda keń taralǵan, «KazGÝgrad» ánin tyńdadyq. Osylaı bilim ordasyndaǵy jańa aqparat alyp, jańa adamdardy tanı túsken qyzyqty kúnimiz jalǵasa berdi. «Balmuzdaq» degen ataýdy unatpaı jatatyndar da bar. Maǵan «Balmuzdaq» ataýy qatty unady. Ekinshi, úshinshi kýrs stýdetteri bizben tanysyp, biz kelgende qarsy alyp «Balmuzdaqtar» dep ataǵan bolatyn. Biz de bıyl kelgen stýdenttermen tanysyp, «Balmuzdaqtar» dep atap, jelide suraqtaryna jaýap berip júrmiz. QazUÝ-dyń joǵary kýrs stýdentteri birinshi kýrs stýdentterine barynsha qamqor bolady. QazUÝ-da stýdentterge beriletin múmkindikter joǵary. Tek ony durys paıdalaný bizdiń enshimizde. Almatynyń ásem jerlerin kórip, sol jerlerge qatysty oı-pikir qalyptastyrý rýhanı damýdyń bir túri degen oıdamyn. Ázirge murajaılardyń barlyǵynda bolmasam da, murajaılardy kórip shyǵý josparymda bar. Oqý ornyna kelgeli dostarymnyń sany arta tústi. Qazir qashyqtyqtan bilim alýdamyz. Qazir estelikke, jylylyqqa oranǵan qara shańyraqty saǵynyp júrmiz. Ustazdarmen jáne toptaǵylarmen amandyqta qaýyshaıyq degen tilektemin. Stýdentte múmkindik te, ýaqyt ta kóp, tek ony durys jumsaıtyn baǵyt bolsa bolǵany. Sonda baqyttyń da bolǵany. Atam stýdenttik ómirin erekshe sezimmen, saǵynyshpen aıtyp bergende «tezirek stýdent bolsam» dep armandaýshy edim. Stýdenttik ómir shynynda da erekshe, qaıtalanbaıtyn, tátti estelikterge toly bolatyndyǵyn sezinýdemin. Bastysy, stýdenttik ómirdi jaı ǵana estelikterge toltyrýdy emes, jaqsy estelikterge toltyrýdy maqsat ettim. QazUÝ-ǵa jan-jaqtan talantty   stýdentter men magıstranttar, doktoranttar jınalǵan. Olardyń bilimdi ári básekege qabiletti bolýyna barlyq múmkindik qarastyrylǵan. Qara shańyraqtan alar bilimimiz, úırenerimiz kóp.

 

Ádebı keńesshi: Talǵat Bekbolatuly, ál-Farabı atyndaǵy QazUÝ-dyń oqytýshysy, doktorant

Oryndaǵan: Daýletııar Gúlzamıra, ál-Farabı atyndaǵy QazUÝ-dyń 2-kýrs stýdenti

Pikirler