El shebin kúzetý erekshe mindet qoı. Shekaranyń qyraǵy qorǵalýy –memlekettegi beıbitshilik pen damýdyń negizi.
Osy jyldyń basynda Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda qolǵa alynǵan «Qazaqstannyń 100 jańa esimi» jobasynyń jeńimpazy retinde menimen kezdesýge baılanysty uıymdastyrylǵan is-sharada Qazaqstan Respýblıkasy Ulttyq qaýipsizdik komıteti Shekara qyzmetiniń «BORAN» desanttyq-shabýyldaýshy manevrlik tobynyń 20 jyldyǵyna oraı Namys jáne Erlik merekelik medalimen marapattaldym. Bul meni erekshe sezimge bóledi!
Ofıerler men kelisimsharttaǵy áskerı qyzmetshilerdiń jigerin shyńdaıtyn, ulttyq namysyn qaıraı túsetin jalyn atqan oıly sózder aıtýǵa tyrystym. Búgingi tańda qazaqtyń halyqtyq qasıetin saqtap qalý asa mańyzdy. Ásirese, keıingi kezde ıesiz qalǵan keıbir jas býynnyń sendelgen sanasyn bir arnaǵa baǵyttap, ulttyq múdde úshin kúrese biletindeı «El barda er qor bolmas, Er barda el qor bolmas.» degen sııaqty ómirlik kredosyn qalyptastyrý árbirimizdiń mindetimiz dep bilemin.
Kezdesý barysynda til máselesine erekshe kóńil bólindi. Kóptegen suraqtar qoıylyp, keleli áńgime órbidi. Elbasy Nursultan Nazarbaevtyń 2017 jylǵy 26 qazanda «Qazaq tili álipbıin kırıllıadan latyn grafıkasyna kóshirý týraly» Jarlyqqa qol qoıǵanyn bilemiz. Bul jazýdy jańa álipbıge kóshirýdiń lıngvıstıkalyq, mádenı-áleýmettik, aqparattyq, saıası jáne ekonomıkalyq sebepterine sáıkes jasalǵan mańyzdy qadamdardyń biri boldy. Memleket basshysy Qasym-Jomart Toqaev «Qazaq tiline reforma, tipti qajet deseńizder tilimizdi jańǵyrtý qajet. Ǵalymdarymyzdyń salmaqty pikirlerin kútemiz. Taǵy da qaıtalap aıtamyn, biz naqty qazaq tilin reformalaımyz. Mundaı ultymyz úshin taǵdyrsheshti máselede naýqanshyldyqqa jáne jeńiltektikke jol berýge bolmaıdy», – degen bolatyn. Jańa álipbıdiń jańa dáýir bastaýy jáne rýhanı táýelsizdikke jasalǵan qadam ekenin áste esten shyǵarmaǵanymyz jón dep oılaımyn.
Qazaq halqy sonaý este joq eski zamandardan-aq at tuıaǵymen dúnıeni dúbirletken kóne túrkilerdiń tikeleı urpaǵy ǵoı. Babalarymyz o sheti men bu shetine qulan jortsa tuıaǵy tozatyn, qyran ushsa qanaty talatyn ulan-ǵaıyr jerdi saqtap qaldy. Elin, jerin, tilin jan aıamaı qorǵaı biletin otanshyldarymyz kóp bolǵaı!
Qýanysh Jumabekuly
PhD doktory,
A.Baıtursynuly atyndaǵy Til bilimi ınstıtýtynyń ǵylymı qyzmetkeri
