El şebın küzetu erekşe mındet qoi. Şekaranyŋ qyraǧy qorǧaluy –memlekettegı beibıtşılık pen damudyŋ negızı.
Osy jyldyŋ basynda Qazaqstan Respublikasynyŋ Tūŋǧyş Prezidentı – Elbasy Nūrsūltan Äbışūly Nazarbaevtyŋ «Bolaşaqqa baǧdar: ruhani jaŋǧyru» baǧdarlamalyq maqalasy aiasynda qolǧa alynǧan «Qazaqstannyŋ 100 jaŋa esımı» jobasynyŋ jeŋımpazy retınde menımen kezdesuge bailanysty ūiymdastyrylǧan ıs-şarada Qazaqstan Respublikasy Ūlttyq qauıpsızdık komitetı Şekara qyzmetınıŋ «BORAN» desanttyq-şabuyldauşy manevrlık tobynyŋ 20 jyldyǧyna orai Namys jäne Erlık merekelık medalımen marapattaldym. Būl menı erekşe sezımge böledı!
Ofiserler men kelısımşarttaǧy äskeri qyzmetşılerdıŋ jıgerın şyŋdaityn, ūlttyq namysyn qairai tüsetın jalyn atqan oily sözder aituǧa tyrystym. Bügıngı taŋda qazaqtyŋ halyqtyq qasietın saqtap qalu asa maŋyzdy. Äsırese, keiıngı kezde iesız qalǧan keibır jas buynnyŋ sendelgen sanasyn bır arnaǧa baǧyttap, ūlttyq müdde üşın kürese bıletındei «El barda er qor bolmas, Er barda el qor bolmas.» degen siiaqty ömırlık kredosyn qalyptastyru ärbırımızdıŋ mındetımız dep bılemın.
Kezdesu barysynda tıl mäselesıne erekşe köŋıl bölındı. Köptegen sūraqtar qoiylyp, kelelı äŋgıme örbıdı. Elbasy Nūrsūltan Nazarbaevtyŋ 2017 jylǧy 26 qazanda «Qazaq tılı älıpbiın kirillisadan latyn grafikasyna köşıru turaly» Jarlyqqa qol qoiǧanyn bılemız. Būl jazudy jaŋa älıpbige köşırudıŋ lingvistikalyq, mädeni-äleumettık, aqparattyq, saiasi jäne ekonomikalyq sebepterıne säikes jasalǧan maŋyzdy qadamdardyŋ bırı boldy. Memleket basşysy Qasym-Jomart Toqaev «Qazaq tılıne reforma, tıptı qajet deseŋızder tılımızdı jaŋǧyrtu qajet. Ǧalymdarymyzdyŋ salmaqty pıkırlerın kütemız. Taǧy da qaitalap aitamyn, bız naqty qazaq tılın reformalaimyz. Mūndai ūltymyz üşın taǧdyrşeştı mäselede nauqanşyldyqqa jäne jeŋıltektıkke jol beruge bolmaidy», – degen bolatyn. Jaŋa älıpbidıŋ jaŋa däuır bastauy jäne ruhani täuelsızdıkke jasalǧan qadam ekenın äste esten şyǧarmaǧanymyz jön dep oilaimyn.
Qazaq halqy sonau este joq eskı zamandardan-aq at tūiaǧymen dünienı dübırletken köne türkılerdıŋ tıkelei ūrpaǧy ǧoi. Babalarymyz o şetı men bū şetıne qūlan jortsa tūiaǧy tozatyn, qyran ūşsa qanaty talatyn ūlan-ǧaiyr jerdı saqtap qaldy. Elın, jerın, tılın jan aiamai qorǧai bıletın otanşyldarymyz köp bolǧai!
Quanyş Jūmabekūly
PhD doktory, A.Baitūrsynūly atyndaǧy Tıl bılımı institutynyŋ ǧylymi qyzmetkerı
