Estrada ánshisi Ernar Aıdar lotoreıa oıynyna qatysyp, aldanyp qalǵandarǵa aqshasyn nege qaıtara almaıtynyn aıtty. Ol buǵan deıin lotoreıa oınatyp jatqan jerinen qolǵa túsken edi. Osy oqıǵadan soń ánshi seriktesterimen (lotareıa oınatýshylarmen - avt.) birge tergeýge alyndy. Qazir ol tergeýge tek kýáger retinde ǵana qatysyp jatqanyn aıtyp otyr.
Almaty qalasy ekonomıkalyq tergeý departamenti tergeýdi bastaǵan kezde: "Bul top 2020 jyldyń 23 aqpan men 23 sáýir aralyǵynda óte qymbat utys syılyqtaryn - 4 avtokólik (2 sedan jáne 2 djıp) pen Almaty qalasynda bir bólmeli páter jáne basqa da turmystyq tehnıkany oınatpaq bolyp, jalǵan lotereıa oıynyn uıymdastyrǵan. Alaıda, joǵaryda kórsetilgen qundy syılyqtar bolmaǵan. Olar lotereıa oıynyna qatysýshylardy sendirý úshin 4 avtokólikti basqa jeke tulǵalardan jalǵa alǵandyǵy anyqtaldy", - degen habar taratty.
Ernar Aıdardyń aldanyp qalǵan halyqqa ınstagram arqyly arnaǵan sózi.
"Assalaýmaǵalaıkým barshańyzǵa!
Qurmetti lotereıa oıynyna qatysyp aldanyp qalǵan aǵaıyn.
Men sizderdi jaqsy túsinemin, sizder maǵan senip lotoreıa bıletin satyp aldyńyzdar (ol úshin basymdy ıip keshirim suraımyn), Dál sizderdeı men de oıyn uıymdastyrýshylaryna senip aldanyp otyrmyn.
Alla bárin kórip turǵoı, osy oıynǵa qatysty mende tıtteı de bolsyn aram oı bolǵan emes, sol sebepti maǵan da túsinistikpen qaraýlaryńyzdy ótinip suraımyn.
Qazirde @der_almaty (Almaty Qalasy Boıynsha Ekonomıkalyq Tergeý Departamentinde) tergeý jumystary júrip jatyr.
Men eshqaıda qashyp júrgen joqpyn.
Sol tergeý jumystaryna kýáger retinde bar shyndyqty aıtyp, tergeýdiń aıaqtalýyn kútip júrmin.
Qurmetti aǵaıyn sizder satyp alǵan bılettiń aqshasyna keler bolsaq, ol aqshanyń bir teńgesi de mende emes, sizderge bıletti satyp aqshasyn alǵan sol oıynnyń uıymdastyrýshylary Ospanov Azat, Temirbek Ernar, qazirde osy uıymdastyrýshylarǵa tergeý jumystary júrip jatyr, ıaǵnı sizderdiń aqshalaryńyz sol uıymdastyrýshylarda. 👆
Men tek jarnama jasadym: ol úshin qatty ókinemin 😢, sizderden shyn júregimmen basymdy ıip keshirim suraımyn 🙏.
"Jarnama úshin alǵan aqshańdy halyqqa bermeısiń ba? Qaırymdylyqqa kómektespeısińba?" dep surap jatqan aǵaıynǵa aıtarym.
-Dál osy jarnama jasap, alǵan aqshamnyń atynan men ózdigimshe eshteńe isteı almaımyn, barlyǵyn zań sheshedi. Tergeý bitip, sot qalaı sheshim qabyldaıdy solaı bolady. Zań júzinde jarnama úshin alǵan aqshańdy qaıtar dese qaıtarýǵa daıynmyn.
Zań júzinde jarnama úshin alǵan aqsha ózińde qalady dep sheshim qabyldasa, onda Alla qalasa, Alla razylyǵy úshin men ol aqshany qaırymdylyqqa jumsaýǵa da daıynmyn.
( Alaıda, aldyn da, qazirgi tańda da ózimniń atymnan, otbasymnyń atynan, jasyryn da, jarııa da Alla razylyǵy úshin, qoldan kelgenshe qaırymdylyq jasap júrmiz).
Aq qarasyn bilmeı, maǵan qarǵys aıtyp, jaman sózder aıtyp jatqan aǵaıyn: "Júıeli qarǵys júıesin tabady, júıesiz qarǵys ıesin tabady". Iıa men súrindim. Múmkin sizder adamzattyń eshqashan súrinbeıtin túrinen shyǵarsyzdar! Mende óstip-óstip ómir súrýdi bir kúnderi úırenermin. Ýaqyt tóreshi.
Men sizderge tek qana jaqsylyq tileımin!
Tergeýdiń aıaqtalýyn kúteıik!".
Eske sala keteıik, lotoreıa oıynyn tek Ernar Aıdar ǵana emes, Qaırat Nurtas, Búrkit, Mádına Sadýaqasova, Nurlan Espanov, Aıqyn, Aıgúl Imanbaeva, Sıvı Mahmýdı, Baǵlan Ábdiraıymov, Qaraqat Ábildınalar da ótkizgen.
Jasulan Naýryzáli,
"Adyrna" ulttyq portaly
