Shymkent jyl sanap jasyl jelekti qalaǵa aınalyp keledi. Megapolıste jasyl aımaqtyń aýmaǵy aldaǵy bes jylda 13 000 gektarǵa ulǵaıady.
«Jasyl beldeý» kommýnaldyq memlekettik mekemesi 2020-2025 jyldarǵa arnalǵan is-shara josparyn ázirlegen. Josparǵa sáıkes, 2021 jyly jańadan 500 gektar jerge 620 000 túp aǵash kósheti otyrǵyzylady.
Bıyl 800 myńǵa jýyq aǵash egý josparlanǵan bolsa, kóktemde sonyń 72 myń túbi otyrǵyzylǵan. Al, kúzde 700 myńnan astam kóshet senbilikter aıasynda egiledi.
Sonymen qatar, bıyl 8 aıda 201,1 myń sharshy metr aýmaqqa jazdyq gúlder men 18,5 myń sharshy metr jerge gazon jáne 159 700 túp lıgýstrým egilgen.
Jasyl aımaqqa egiletin aǵash kóshetterin ázirleý maqsatynda qalada 8 gektarlyq tuqymbaq uıymdastyryldy. Qazirgi tańda tuqymbaqtyń 1 gektar jeri tolyq sýǵarylyp, 300 keli emen tuqymy jáne 100 dana buta tárizdes legýstra aǵashynyń qalamshalary otyrǵyzylýda. Jalpy, tuqymbaqqa aldaǵy ýaqytta ár túrli aǵashtardyń 3 195 tonna tuqymyn sebý, buta jáne aǵash kóshetteriniń 65 000 dana qalamshalaryn egý josparlanýda.
Shymkent qalasy ákiminiń baspasóz qyzmeti
