Reseı saıasatkeri Vladımır Jırınovskıı taýly Qarabahtaǵy jaǵdaıǵa baılanysty pikir bildirdi dep habarlaıdy «Adyrna» ulttyq portaly Vestnık Info agenttigine silteme jasap. Sózderi shashyrańqy shyqsa da, sharshaǵan saıasatkerdiń aıtqanynan biraz nárseni ańǵarýǵa bolady.
Taýly Qarabahtaǵy jaǵdaıdy koronavırýske teńegen reseılik saıasatker Ázerbaıjan men Armenııa arasyndaǵy bul soǵys úlken soǵysqa jol ashýy múmkin deıdi. «Shıelenisti beıbit jolmen sheshý múmkin emes. Ázerbaıjandar parsy taıpasynyń ókilderi. Etnıkalyq jaǵynan ırandar men ázerbaıjandar bir birine óte jaqyn ult. Túrikter Shyǵys Azııadan kelip olardy túrkilendirdi. Iaǵnı, birneshe ǵasyr boıyna ázerbaıjandarǵa túrik tilin úıretip, túrikke aınaldyrdy. Mine, sondyqtan olarda ózara uqsastyq paıda boldy. Desek te, ázerbaıjannyń tilderi túrik tili emes. orys pen belarýs sııaqty bir birin jaqsy túsinedi. Armıandar musylmandar qonystanǵan aımaqta qalyp ketken hrıstıan áleminiń Brest qamalyndaı bólshegi.
Taýly Qarabahtaǵy jaǵdaı Túrkııanyń aralasýymen shıelenisti. Túrkııa prezıdenti Erdoǵan aınalasyndaǵy súnnıtterdi bir týdyń astyna biriktirmek maqsatynda Sırııa, Lıvııa máselelerine de aralasty. Erdoǵannyń kóksegeni baıaǵy Osman ımperııasyn jartylaı bolsa da jańǵyrtý. Sırııanyń bir bóligin, Armenııadan da bir bólik aımaqty, Túrkimenstannan t.s.s alyp qalǵysy keledi. bul ǵasyrlarǵa sozylatyn másele. Bul máselege Reseı aralaspaı, sheshimi tabylmaıdy. Ol úshin Reseıge orasan zor kúshke aınalýy kerek, Reseı qýatty elge aınalýy kerek. Reseı aralasyp qana árkimniń óz ornyn qaı jerde ekenin kórsete alady. Eń birinshi, kúrdterge táýelsizdik áperip, Kúrdistan memleketin qurýyna yqpal etedi. Túrkııanyń bir bóligi bolyp tabylatyn kúrdterdiń sany 20 mıllıonnan asady qazir. Armenııaǵa Batys Armenııaǵa qaıtýyna járdem beredi. Bul da Túrkııanyń bir aımaǵy. Eshkim bir birimen soǵyspaýy úshin osylaı jasaý kerek», -degen Jırınovskıı Erdoǵannyń aıylyn jınatýdyń tetikterin kórsetip baqty.
«Reseıdiń quramyna bárin qaıta qosý kerek! Baký gýbernııasy, Erevan gýbernııasy jáne Stepanakert aýdanyn Krasnodar aımaǵyna qosý qajet. Olaı etpese úzdiksiz soǵys jalǵasyp, onyń sońy qaıǵyly aıaqtalady. Qazir shaıqasty toqtatsa, bir jyldan keıin qaıta soǵysady. Bul jaýlastyq birneshe ǵasyrǵa jalǵasyp kele jatyr.Taǵy bir sheshim retinde Patshalyq Reseıdiń ádisin aıtsaq bolady. Reseı ımperııasy jaýlasýshy eki tarapqa da qarý bergen, sóıtip qarsylastar óz taǵdyrlaryn urys alańynda sheshken»,- deıdi reseılik saıasatker.
Raýana DIMAShQYZY,
«Adyrna» ulttyq portaly.
Foto ashyq derekkózden alyndy.
