Shymkenttiń «Standart» komandasy fýtboldan áýesqoılar arasynda ótken Qazaqstan chempıonatynda jeńimpaz atandy.
Chempıonat 18-20 qyrkúıek kúnderi Nur-Sultan qalasynda ótti. Oǵan 35 jasqa deıingi jas kategorııasynda 32 komanda qatysyp, 8 topqa bólinip baq synady.
I tobynda Sátpaev qalasynyń «LFC JB - SATPAYEV», Qaraǵandynyń «TChE-14» jáne Jańaózenniń «Arlan» komandalarynan basym túsken shymkenttik aıaqdopshylar 1/8 fınalda Qaraǵandynyń «Progress» komandasyn jeńdi.
Al, shırek fınalda Aqtaý qalasynan kelgen «Atrıým Geolog» komandasyn 1-0 esebimen jeńgen jerlesterimiz jartylaı fınalda Qaraǵandynyń «K-MED» komandasyn utty. Esep — 4-2.
Fınaldyq kezdesý Nur-Sultan qalasynyń «Esil» saýda úıi» komandasy men shymkenttik «Standart» komandasynyń arasynda ótti. Tartysty ótken matchtyń negizgi ýaqyty 5-5 esebimen teń aıaqtaldy. Penaltıler serııasynda shymkenttik fýtbolshylar 3-2 esebimen jeńiske jetip, el chempıony atandy.
Osymen 8 ret uıymdastyrylǵan chempıonat jeńimpazy Shymkenttiń «Standart» komandasy endi Ýkraınada ótetin álem chempıonatyna qatysady.
Shymkent qalasy ákiminiń baspasóz qyzmeti
