Qańtardyń qar sýyrǵan tańdarynyń birinde skrıpkaly bir kisi Vashıngton metrosynyń qaltarystaý jerine tura qalyp, aspabyn quıqyljytyp oınaı bastaıdy. Ol Bahtyń alty pesasyn 45 mınýt boıy toqtaýsyz oryndap shyqty. Osy ýaqyt aralyǵynda onyń janynan 1100 adam ári-beri sapyrylysyp, óte shyqty.
Mýzyka oınaı bastaǵan alǵashqy úshinshi mınýtta ótip bara jatqan egde kisi qalt tura qalyp, mýzykantqa edáýir nazar salyp turdy. Sosyn, esine shuǵyl sharýasy túskendeı, asyǵa basyp jónine ketti. Endi birer mınýttan keıin jedel basyp ketip bara jatqan bir áıel toqtamastan skrıpkashynyń aldyna birer dollardy tastap ótti. Odan keıin bir kisi qabyrǵaǵa súıenip, mýzyka tyńdaǵysy kelgendeı keıip tanytty da.., saǵatyna qaraǵany sol eken, ol da júgire basyp jónine ketti.
Sanany solqyldata oınaǵan skrıpkanyń sıqyrly únine uzaǵyraq aıaldaǵan jasy úshter shamasyndaǵy balaqaı boldy. Alaıda, onyń anasy súırelep, ol jerden tez uzaı berdi. Bul mańnan ótken balaqaılardyń barlyǵy derlik mýzyka únine elitip, uzaǵyraq tyńdaǵysy keldi. Biraq, barlyǵynyń ata-anasy olardy súıreleýmen boldy.
Mýzykant múdirmesten 45 mınýt kúı tartqanda, nebary 6 adam ǵana kishkene uzaǵyraq aıaldaǵan. Ótkinshilerdiń 20 shaqtysy ǵana tıyn-teben tastap, barlyǵy 32 dollar jıylǵan. Aqsha tastaýyn tastasa da, birde-bir adam tushynyp mýzyka tyńdamaǵan. Mýzykant áıgili týyndylaryn náshinine keltirip oryndap bolǵannan keıin, oǵan eshkim qol soǵyp, qoshýaq ta almaǵan. Tipti, ol saǵatqa jýyq skrıpkada janyn salyp oınamaǵandaı, eshbir jan eleń de qylmapty...
Myńnan asa adam mán bermeı óte shyqqanyna qaramastan, áıgili Bahtyń týyndylarynyń eń kúrdelilerin asqan sheberlikpen oryndap shyqqan álemdik dárejedegi dáýlesker skrıpkashylardyń biri Djoshýa Bell edi. Onyń qolyndaǵy mýzyka aspabynyń ózi 3,5 mıllıon dollar turatyn. Sonyń aldynda ǵana Boston teatrynda ótetin onyń konertiniń bıletteri pyshaq ústinen satylyp ketken bolatyn. Djoshýanyń konerti úshin bıletterdiń eń arzany 100 dollar ekeni jáne bar...
Washington Post gazeti eńbek adamdarynyń talǵamyn, kezdeısoq tap bolǵan shynaıy óner týyndysyn qalaı qabyldaıtynyn anyqtamaq bop "Djoshýa Bell metroda jarnamasyz kúı tartady" dep atalatyn áleýmettik joba uıymdastyrǵan eken. Atalmysh tájirıbeden keıin jobanyń uıymdastyrýshylary "Álemdik mýzykanyń has sheberi oryndaǵan ónerdiń ozyq týyndysyna birer mınýtymyzdy arnaı almasaq, ómirde sát saıyn janymyzda bolyp jatqan mańyzdy oqıǵalarǵa mán berýimiz neǵaıbyl!" degen tujyrymǵa kelipti...
Qanat ESKENDIR
