Túrkistan oblysynda qoryqshylar osylaı dep shý shyǵardy, dep habarlaıdy Dalanews.kz KTK telearnasyna silteme jasap.
Syrdarııa-Túrkistan memlekettik óńirlik tabıǵı parkinde eki jyldan beri qyzmet pen erekshe qorǵalýy tıis aǵashtardyń saýdasy qyzǵan. “Al olarǵa tosqaýyl bolatyn quzyrly organ kúngeıde joq”, – deıdi ormanshylar.
Sebebi, park basshysynyń orynbasary oblys ákimi Ómirzaq Shókeevtiń kúıeý balasy bolsa, park fılıalynyń dırektory qazirgi Sozaq aýdany ákiminiń uly. Aty atalǵan ekeýi muny joqqa shyǵardy.
Abylaıhan Shaldarov úsh jyl bul baqta ormanshy bolǵan. Aıtýynsha, mundaǵy Qyzyl kitapqa engen torańǵyl men jıde aǵashtary jappaı qyrqylyp jatyr. Toǵaıdy qorǵaýy tıis ınspektorlar basshylardyń pármenimen aǵash saýdagerine aınalǵanyn aıtqany úshin jyl basynda jumystan ketipti. Syrdarııa-Túrkistan memlekettik óńirlik tabıǵı parki basshysynyń orynbasary men park fılıaly dırektory kelgeli “ómirimiz, tipti tozaqqa aınaldy” dep kúıinedi ol.
Abylaıhan Shaldarov, burynǵy ormanshy:
– 2018 jyldan beri osy eki kisi keldi. Polatov Nurjan men Ábdiqadyrov Aqyl degen. Ylǵı sonymen qyz ákep demalady. Bizdi shaqyryp alady: “Oıbaı, tez, qoı ákelińder, myna jerge shashlyk isteýimiz kerek. Konıak, kalıan shegýimiz kerek”. Ákelmeseń, ertesine seni zańmen jumystan shyǵarady.
Ormannan aqsha jasaýdyń tásili kóp eken. “Gazy joq, qysta kómiri qymbat Otyrar aýdanynda bir arba ǵana otyn satýǵa ruqsat beretin bıletpen 100 arba otyn satylady”, – deıdi burynǵy qoryqshylar. Otyndy bylaı qoıǵanda, Otyrarda jıde men torańǵyldy qada qylyp, bıznes jasaý úrdisi bar. Bir ǵana jıde taldan 7 qada jasaýǵa bolady. Qada degenińiz, kesilip daıyndalǵan bórene. Jergilikti qara bazarda bir ǵana qadanyń baǵasy – 400 teńge.
Sonyń saldarynan erekshe qorǵalyp, jaıqalýy tıis orman qyp-qyzyl bızneske aınalyp, jaıpalyp barady. “Ár túsken teńgeni aǵa ormanshynyń qaltasyna basyp, odan qalsa, Nurjan Polatov pen Aqyl Ábdiqadyrovtyń jynoınaǵyna salamyz” – dep ashynǵan ormanshylar osyny basshylarǵa aıtyp, basy bálege qalǵan.
Abylaıhan Shaldarov, burynǵy ormanshy:
– “E, mynaý ne desem», Nurjan Polatovtyń aıtýy: «Oıbaı, Abylaı, seniń sharýań bolmasyn, myna jumystan ket, men seni istetpeımin, shyq, boldy, ary qaraı eńbek qorǵaý bólimine jazasyń ba, qarjy polıııasyna jazasyń ba, prokýratýraǵa jazasyń ba, men ózim sheship alamyn”. “Qazir, Abylaı, tanys sheshedi”. Aqyldyń aıtýy da sol: “Meniń qaıyn aǵam turǵanda, eshkim eshteńe isteı almaıdy” – deıdi.
Syrdarııa-Túrkistan saıabaǵy basshysynyń orynbasary Aqyl Ábdiqadyrov degen oblys basshysy Ómirzaq Shókeevtiń týǵan kúıeý balasy, al fılıal dırektory Nurjan Polatov Otyrar aýdanyna talaı jyl ákim bolǵan, qazir Sozaq aýdanynyń ákimi Salyhan Polatovtyń uly. Parktegi bylyqty áshkereleý úshin burynǵy ormanshylar men aýdan turǵyndary bıyl polıııa men aýmaqtyq ınspekııa ókilderin ertip reıd jasaǵan eken.
“Júzdegen aǵashtyń shabylǵany anyqtalǵanymen, sol kúıi shara qoldanylmady” – deıdi turǵyndar.
Beıbit Syzdyqov, Otyrar aýdanynyń turǵyny:
– Oblys prokýroryna, biraq oblys prokýrory tabıǵatty qorǵaý prokýroryna jiberdi, tabıǵatty qorǵaý prokýrory komıtetke jiberdi, komıtet Qalymbetovke jiberdi, qaıtyp Qaıyrbekovke keldi. Sonymen, ne tekserilmeıdi, ne qoımaıdy.
Saıabaqty saýyq-saıran ornyna aınaldyrdy dep aıyptalǵan basshylardy izdep Túrkistanǵa bardyq. Nurjan Polatov ornynda joq. Hatshysy onyń syrqattanǵanyn aıtsa, qyzmetkeri “jumys babymen reıdte júr” dep shatasty. Esesine, oblys ákimi Ómirzaq Shókeevtiń kúıeý balasy kezdesýden qashpady.
“Ormanshylardyń ózi qylmyspen aınalysyp júrgen soń, qyzmetke kele sala, tártipke keltiremiz dep, unamaı qaldyq”- deıdi Aqyl Ábdiqadyrov.
Aqyl Ábdiqadyrov, Syrdarııa-Túrkistan memlekettik óńirlik tabıǵı parki KMM bas dırektorynyń orynbasary:
– Aǵash shaptyrý,demalý, qoı soıdyrý deı me…
– Qyzdarmen demalý degen sııaqty…
– Joq, qyzdar joq ol jerde. Sonyń bári jala. Óıtkeni ondaı tirlik bolmaǵan. Jala-jabý, ar-namys taptaý kóp qoı ol jerde. Ózimiz ol jerde zańmen sheshemiz ǵoı.
Basshy endi óz qyzmetkerlerin sotqa bermekshi. Al “qaı jaqqa jazsaq ta, ádildik tappadyq” degen ormanshylar Túrkistan oblysynda toǵaıda bolyp jatqan kóleńkeli bızneske tosqaýyl qoıar eshkimniń joǵyna senimdi. Sondyqtan astanadaǵylar kórip, aq-qarasyn aıtar dep úmittenedi.
